لە سلێمانی هێرشی مەخمور و ترابزون شەرمەزار كران

ڕێكخراوی كرێكارانی میزۆپۆتامیا بە لێدوانێكی ڕۆژنامەوانی هێرشی فرۆكە جەنگییەكانی دەوڵەتی توركی داگیركەری بۆ سەر مەخموور و ‌هێرشی توركە رەگەز پەرستەكانی بۆ سەر گەشتیارانی باشوری كوردستان لە ترابزۆن شەرمەزار كرد.


دوای نیوەڕۆی ئەمڕۆ ڕێكخراوی كرێكارانی میزۆپۆتامیا لە ناوەندی خۆی لەشاری سلێمانی بە لێدوانێكی ڕۆژنامەوانی هێرشی دەوڵەتی توركی بۆ سەر كامپی شەهید ڕۆستەم جودی شەرمەزار كرد، داواشیان لە نەتەوە یەكگرتوەكان كرد سنورێك بۆ دەوڵەتی توركیای داگیركەر دابنێت لە ئاست دەستدرێژییەكانی بۆسەر ئەو كامپە.

لەسەر ناوی ڕێكخراوەكە ئیحسان یەڵدز قسەی كرد وتی: ئێمە وەك ڕێكخراوی كرێكارانی میزۆپۆتامیا هێرشەكانی دەوڵەتی  توركی داگیركەر بۆسەر مەخمور شەرمەزار دەكەین كارێكی دڕندانیە، ئامانجی توركیا بەو هێرشانە لە ناوبردنی گەلی كوردە.

یەڵدز وتیشی: ئەو كەمپە لە ژێر بەرپرسیاریەتی نەتەوە یەكگرتوەكانە، ئەركی پاراستنی ئەو كەمپەش لە هێرشی داگیركاری توركیا دەكەوێتە سەر شانی نەتەوە یەكگرتوەكان، هاوكات دەبێت حكومەتی عێراقیش خاوەن هەڵویست بێت و بێدەنگ نەبێت لە ئاست ئەو پێشلكاریەی دەوڵەتی توركیا.

لە بەشێكی تری قسەكانی ئیحسان یەڵدز هێرشەكانی توركە ڕەگەز پەرستەكانی لە ترابزۆن بۆ سەر گەشتیارانی كورد شەرمەزار كرد و وتی: ئەو هێرشە ئەوەی سەلماند كە دەوڵەتی تورك دژی هەموو گەلی كورد و ناوی كورد و كوردستانە، بۆیە دەبێت ئێمەش لە ئاستی داگیركاری و ئینكاری دەوڵەتی تورك یەكگرتوو بین.

د.ح