چوؤرشەممە, 15 أغس 2018 – 18:03 ڕۆژنیوز – كەركوك
بەپێی نوسراوێكی نوسینگەی سەرۆك وەزیرانی عێراق، كە سەرەتای ئەم مانگە دەرچووە، فەرمانی ڕاگرتنی دابەشكردنی زەویە كشتوكاڵییەكانی كەركوك بەسەر عەرەبی هاوردەدا دەركراوە.
بڕیارەكە دوای كۆبوونەوەیەكی شاندێكی بەرپرسانی كورد و توركمان لەگەڵ وەزیری كشتوكاڵی عێراق دەركراوە.
یەكێك لە ئەندامانی بەشداربووی كۆبونەوەكە، كە نەیوست ناوەكەی ئاشكرا بكرێت، بە ڕۆژنیوزی ڕاگەیاند:” لە ماوەی ڕابردوودا شاندێكی كورد و توركمان سەردانی وەزیری كشتوكاڵی عێراقمان كرد بۆ ڕاگرتنی دابەشكردنی زەویە كشتوكاڵییەكانی كەركوك بەسەر عەرەبی هاوردەدا، كە لە سەردەمی سەدام حوسێن ئەو عەرەبانە لە كەركوك جێگیركراون”.
وتیشی:” شاندی كوردی و توركمان یەكهەڵوێست بوون لەسەر ئەوەی ئەو زەویانە كە موڵكی توركمان و كوردن و نابێت عەرەبی هاوردە دەستی بەسەردا بگرێت، دوای پێشكەشكردنی داواكارییەكانمان، بڕیاردرا بە ڕاگرتنی دابەشكردنی ئەو زەویانە بەسەر عەرەبی هاوردەدا”.
ئاماژەی بەوەشكرد:” بە نوسراوێكی فەرمی لایەنی پەیوەندار لە كەركوك ئاگادار كراوەتەوە، كە دەبێت ئەو زەویە كشتوكاڵیانە وەك خۆی بمنێتەوە و تەنها خاوەنە ڕاستەقینەكانیان دەتوانن كار بەو زەویانەوە بكەن”.
دوای ڕوداوەكانی ١٦ی ئۆكتۆبەر بە هەزاران دۆنم زەوی كشتوكاڵی كەوتنە بەر شاڵاوی داگیركردن و دابەشكران بەسەر عەرەبی هاوردە، ئەو عەرەبانەی دانیشتوی ڕەسەنی شارەكە نیین، ئەوەش لە لایەن پارێزگاری بەوەكالەتی كەركوكە ئەنجام درا.
ك.ك/س
