لە هەولێر ١٨ هەزار بروشور بۆ بایکۆتی كاڵای توركی دابەشكراوە

سەرپەرشتیاری تیمی گەڕۆكی هەڵمەتی بایكۆتكردنی كاڵای توركی لە شاری هەولێر ڕایدەگەیەنێت، لە ماوەی دەستپێكردنی هەڵمەتەكەوە تائێستا لە هەولێر، زیاتر لە ١٨ هەزار بروشوری تایبەت بە بایکۆتی كاڵای توركیان دابەشكردوە و خەڵکیش پێشوازییەكی گەرمیان لە هەڵمەتەکە کردووە، ئاشکراشیدەکات، لەژێر كاریگەری بایكۆتدا ئاڵتون سا ٤٠٪ فرۆشی كەمی كردووە.


لەدوای هێرشەكانی دەوڵەتی تورك بۆ سەر ڕۆژئاوای كوردستان و باکووری سوریا هەڵمەتی بایكۆتكردنی كاڵای توركی لە ڕێگەی تۆڕەکۆمەڵایەتییەکان و تیمی گەڕۆکەوە لە شار و شارۆچکەکانی هەرێمی کوردستان دەستیپێكرد و تاوەكو ئێستاش هەڵمەتەكە بەردەوامە.

ڕێباز فاروق، سەرپەرشتیاری تیمی گەڕۆكی هەڵمەتی بایكۆتكردنی كاڵای توركی لە شاری هەولێر بە ڕۆژنیوزی وت: زیاتر لە ١٨ هەزار بروشوری تایبەت بە هۆشیاریی بۆ بایکۆتکردنی كاڵای توركی لە ناوبازاڕدا دابەشكراوە و لەناو خەڵكیش پێشوازییەكی گەرم لە بایكۆت دەكرێت.

وتیشی: زۆر شوێن هەیە لەوانە دەرمانخانەكان دەڵێن دەرمانی توركی بەكارناهێنن و خەڵكیش توڕەیە، بۆیە لەگەڵ بازرگانان ئاراستەی خۆیان گۆڕیوە.

ئاماژەی بۆ ئەوەشکرد کە لەژێر كاریگەری بایكۆتدا ئێستا كۆمپانیای ئاڵتون سا ٤٠٪ فرۆشی كەمی كردووە.

سەرپەرشتیاری تیمی گەڕۆكی هەڵمەتی بایكۆتكردنی كاڵای توركی لە شاری هەولێر، ڕاشیگەیاند کە "هەڵمەتەكانمان بەردەوام دەبێت و هەمەجۆر دەبێت لە داهاتوودا گردبونەوە دەكەین بەتایبەتی دژی درامان كە دەستی خستۆتە ژیان و قەوارەی خێزانمان، هەروەها لەگەڵ هونەرمەندان دەست دەكەین بە هەڵمەت و فشار دروستکردن لەسەر وەزارەتی ڕۆشنبیری بۆ ئەوەی بە تەواوەتی دراما تورکییەکان ڕابگرێت".

ک.س