لە هەولێر یادی کاوە گەرمیانی کرایەوە

لە یادی پێنج ساڵەی تیرۆركردنی  کاوە گەرمیانی، ڕۆژنامەنووسانی هەولێر لەبەردەم پەرلەمانی هەرێمی كوردستان  گردبوونەوەیەكیان ئەنجامدا و تیایدا داوای ئاشكراكردنی دۆسیەی تیرۆری ڕۆژنامەنووسان كرا.


ئەمڕۆ لە شاری هەولێر ڕۆژنامەنووسانی شارەكە لەبەردەم پەرلەمانی هەرێمی کوردستان گردبوونەوە و یادی کاوە گەرمیانی-یان کردەوە،  ڕاگەیەندراوێکیشان خوێندەوە.

لە راگەیەندراوەکەدا، کە لەلایەن بەهزاد موحسین،  لە ڕێكخراوی زار بۆ ئازادییەكان-ەوە  خوێندرایەوە، ئاماژە بەوەکراوە، کە بوێریی و ڕاستگۆیی کاوە و ئاشکراکردنی گەندەڵیی بەرپرسەکان هۆکاری تیرۆرکردنی بوو.

هەر لە ڕاگەیەندراوەکەدا هاتبوو:"لە ساڵانی ڕابردوودا، سڕینەوەی فیزیكیی سۆران لە كەركوك و سەردەشت لە هەولێر و كاوە لە گەرمیان،  وەدات حسێن و شوكری زەینەدین لە دهۆك و شەهیدانی حەڤدەی شوباتی سلێمانی و دەیانی تر لەم هەرێمە، جگە لە ڕووڕەشیی و جینایەتكاری ئەم دەسەڵاتە هیچی دیکەمان پێناڵێت".

هەر لەو گردبوونەوەیەدا ڕاگەیەندراوێک لەسەر ناوی ڕۆژنامەنووسانی هەولێر لەلایەن سەعید عەبدوڵا-وە خوێندرایەوە کە تیایدا یادی کاوە گەرمیانیی کرایەوە و ئیدانەكردنی تیرۆری ڕۆژنامەنووسان کرا.

هەروەها، داوای ئاشكراكردنی دۆسیەی تیرۆری ڕۆژنامەنووسان كرا.

ش.ف