بەشێك لە هاوڵاتییان و چالاكوانانی هەڵەبجە، دژ بە داگیركارییەكانی دەوڵەتی تورك، لەناو بازاڕی شارەكە، گرد بوونەوە.
پاشنیوەڕۆی ئەمڕۆ لەناو بازاڕی هەڵەبجە، گردبوونەوە دژی داگیركارییەكانی دەوڵەتی تورك بە دروشمی (سوپای توركیا بۆ دەرەوە) بەڕێوەچوو، لەڕێگەی بەیاننامەیەكەوە، داوا لە سەرۆكی حكومەتی هەرێم كرا، هەڵوێستی هەبێت لەسەر داگیركارییەكانی دەوڵەتی تورك بۆ سەر خاكی كوردستان.
لە ناوەڕۆكی بەیاننامەی چین و توێژەكانی هەڵەبجە كە لەلایەن ئەرسەلان ئێناخییەوە، خوێنرایەوە و ئاراستەی سەرۆكی حكومەتی هەرێمی كوردستان كراوە، هاتوە: ” لە دوای هاتنی دەسەڵاتدارانی حكومەتی توركیا بۆ هەرێمی كوردستان و عێراق و هەڕەشەكردنیان بۆ سەر شەنگال، داوا لە سەرۆكی حكومەت دەكەین، كە لە لوتكەی دەسەڵاتی هەرێمی كوردستانن، وەڵامێكی كوردانە و مرۆڤدۆستانە بدەنەوە بە حكومەتی توركیا” هەر لە بەیاننامەكەدا بۆ سەرۆكی حكومەت، هاتوە: “خاكی هەرێمی كوردستان و دابینكردنی ئاسایش و ئارامیی هەرێم، خاڵێكی كارنامەی چاكسازیی كابینەكەتان بێت، ئەو كاتەش ئێمەی هاوڵاتی، خوێن و ئێسقانی ئێوەین و قەڵغانی ئەو چاكسازییە دەبین و شكست و لاوازبوونی هەر هێزێكی كوردی لەلایەن توركیاوە، دواجار لەناوبردنی هەموو لایەكمانە.”
ئـ ت
