شەممە, 7 أبر 2018 – 12:05
ڕۆژنیوز – ناوەندی هەواڵەکان
لە دژی تۆپارانكردن و داگیرکارییەکانی سوپای تورک لە باشوری كوردستان و وتەكانی نێچیرڤان بارزانی دەربارەی داگیرکارییەکان لە شاری کەرکوک گربوونەوەیەک بەڕێوەچوو، تێیدا داوا لە حکومەتی عێراق کرا چیتر بێدەنگ نەبێت.
ئەمڕۆ، گەنجانی شاری كەركوك لە باخچەی قەڵای شارەکە، دژی داگیرکارییەکانی سوپای بە خولەكێك وەستان بۆ شەهێدانی ئازادی گردبوونەوەیەکیان ئەنجام دا.
لە گردبوونەوەکەدا، حسێن سەباح، بەیانامەیەکی بە ناوی گەنجانەوە خوێندەوە کەتێیدا هاتبوو:”وەك ئاشكرایە سوپای داگیركەری توركیا سنوری باشوری كوردستانی بەزاندووە و دەیەوێت لە هەرێمی كوردستانیش ئۆپەراسیۆنی سەربازی ئەنجام بدات، بەزاندنی سنوورەكان مەبەست لێی شەڕكردن نییە بەرامبەر پەكەكە، بەڵكو ئامانج لێی داگیركردنی بەشێكی زۆری خاكی كوردستانە، لە بەرامبەر ئەم پێشلكاریانەش نەحكومەتی هەرێم نە حكومەتی عێراقیش هیچ هەڵوێستێكیان نییە”.
ئەوەش هاتبوو:”لە بەرامبەر داگیركارییەكانی توركیا، سەرۆكی حكومەتی هەرێم نێچرڤان بارزانی پاڵپشتی خۆی بۆ دەوڵەتی توركیا ڕاگەیاند و هێرشكردنەسەر باشوری كوردستانی بە ڕەوا لە قەڵەم دا، هەڵوێستەكەی سەرۆكی حكومەت وەك ئەندامێكی توركیا فاشیست دەردەكەوێت، بۆیە ئێمە وەك گەنجانی كەركوك ئەو هەڵوێستە نا ئەخلاقییە بە توندی شەرمەزار دەكەین، وە بە سەرۆكی حكومەت دەڵێن لە پێناو مانەوەی خۆتان مامەڵە بە پیرۆزی گەلەوە مەكەن”.
لەو بەیاننامەدا ئاماژە بەوەشكراوە، کە دەوڵەوتی تورك و ئەرۆغان، دەیانەوێت ئیمپراتۆرییەتی عوسمانی دروستبكەنەوە، بەڵام پێویستە باش بزانن لەم سەردەمەدا دەوڵەتێكی دیكەی وەک ئیمپراتۆرییەتی عوسمانی دروست نابێتەوە.
لە کۆتایی بەیاننامەکەدا، هەڵوێستی وڵاتان بۆ پشتیوانی دەولەتی تورک و بێدەنگییان بەرامبەر داگیرکارییەکان شەرمەزار کرابوو، هەروەها هاتبوو:”داوا لە سەرۆكایەتی كۆماری عێراق و پەرلەمان و حكومەتی عێراق دەكەین، لە بەزاندنی سنووری وڵات خۆیان گێل نەكەن و بێنە دەنگ و ئەم هێرشانە بكەن ڕۆژەڤی سەرەكەی پەرلەمان، ئێمەش وەک گەنجان دژی داگیرکارییەکان هەڵوێستمان دەبێت و بەرگری لە خاکی کوردستان دەکەین.
لە گردبوونەوەکەدا چەند دروشمێک لەلایەن گەنجانەوە بەرزکرابوونەوە، لەوانە “داگیرکەر بۆ دەرەوە – بەسە خیانەت”.
س.ح
