یەكشەممە, 15 أبر 2018 – 08:21
ڕۆژنیوز ـ بۆتان گەرمیانی
کۆمەڵەی گەنجانی وڵاتپارێزی کوردستان لە شارۆچکەی کەلار، هێرشەکەی ئاسایشی دهۆکیان بۆ سەر پرسەی شەهید دەمهات ئەحمەد شەرمەزارکرد و هۆشداریشیاندا لەوەی، کە لە ئەگەری دووبارەبوونەوەی کردەوەی بەوجۆرەدا، هەڵوێستی تووند دەنوێنن.
شەوی ڕابردوو، کۆمەڵەی گەنجانی وڵاتپارێزی کوردستان لە بارەگای خۆیاندا لە شارۆچکەی کەلاری ناوەندی ئیدارەی گەرمیان، لە دژی هێرشەکەی ئاسایشی دهۆک بۆ سەر پرسەی شەهید دەمهات ئەحمەد و ڕێگاخۆشکردنی پارتی بۆ سوپای تورک، لە داگیرکردنی خاکی باشوری کوردستاندا، لێدوانێکی ڕۆژنامەنووسییان پێشکەشکرد.
ئارمانج گەرمیانی، ئەندامی کۆمەڵەی گەنجانی وڵاتپارێزی کوردستان لە گەرمیان، بەیاننامەکەی خوێندەوە و تیایدا هاتبوو:”هێرشی چەکدارانی پارتی بۆ سەر مەراسیمی شەهید دەمهات ئەحمەد و چاوساغیکردنیان بۆ سوپای تورک بۆ داگیرکردنی خاکی باشوری کوردستان، شەرمەزار و ڕیسوا دەکەین، لەوەش دڵنیاین ئەم کردەوانە بە فەرمانی دەوڵەتی تورکی فاشیست ئەنجامدەدەن، بۆیە ڕێگا بە فرۆشتنی خاک و سوکایەتیکردن بە شەهیدانمان نادەین”.
گەنجانی وڵاتپارێز، هۆشداریشیان دا به پارتی دیموکراتی کوردستان-عێراق، کە له ئەگەری دووبارەبوونەوەی هەر کردەوەیەکی دیکەی بەوشێوازه، هەڵوێستی زۆر توندمان دەبێت، دەشڵێن:”پارتی هەردەم هێڵی خیانەتی به بنەما گرتووه له دژی گەلی کورد، له هەرچوار پارچه ی کوردستان دژایەتی شۆڕش و سه رکەوتنی گەلی کوردی کردووه، له ئێستاشدا دەیەوێت له باشوری کوردستان پێش له بەرخۆدان و شۆڕشگێڕی بگرێت و هێڵی خیانەت پێشبخات، هاوکات بووەتە چاوساغی دەوڵەتی تورک بۆ داگیرکردنی خاکی باشوری کوردستان”.
ب.ل
