مامۆستایانی زانکۆ ڕایدەگەیەنن، هاوکارییکردنی داگیرکەران خیانەتە بەرامبەر بە خاکی کوردستان و گەلی کورد و دەشڵێن: بێ پلانی دەستەڵاتداران و دووژمنایەتی ناوخۆ وایکردووە، دووژمنان دژی گەلی کورد پلانگێڕیی بكەن.
لە ١٧ی نسانی ئەمساڵەوە، دەوڵەتی تورك بە هاوكاریی پەدەكە، هێرشێكی تری داگیركاری بۆسەر هەرێمی كوردستان دەستپێكردووە، ئەو هێرشە داگیركارییە كاردانەوەی گەلی كوردی بەدوای خۆیدا هێنا و ئیدانەی هێرشەكان و پەلكێشكردنی سوپای تورك كرا لەلایەن پەدەكەوە بۆ باشوری كوردستان.
لەو بارەیەوە، سابیر عەبدولڕەحمان، مامۆستا لە زانکۆی سەلاحەدین دەڵێت: بەهەموو سیفاتەکانەوە دەوڵەتی تورک داگیرکەرە لە خاکی کوردستان، بەڵام تاوەکو ئێستا سەرکەوتوونەبووە لە هێرشەکانی بۆ سەر کوردستان.
ئەو مامۆستایەی زانكۆ لەبارەی خیانەتی ناوخۆییەوە وتی: هەر لایەنێکی کوردیی هاوکاریکردنی هێزەکانی داگیرکەری تورک بکات، خیانەت بەرامبەر بە خاک کوردستان دەكات.
باس لەوەش دەكات، گەلی کورد ڕابردووێکی تاڵی هەیە، لە دروستبوونی شەڕی کورد بە کور و دەڵێت: نابێت لایەنەکان زاتی ئەوە بکەن هاوکاریی دەوڵەتی تورک بکەن، پێویستە هەموو لایەنەکان بەرنامەی هاوبەشیان هەبێت، لەبەرامبەر هێرش و لەشکرکێشیەکانی سوپای تورک بۆ سەر خاکی کوردستان.
هەر لەسەر ئەو پرسە، بەختیار کەمال تاڵەبانی، مامۆستای لە زانکۆی سلێمانی بۆ ڕۆژنیوز وتی: ناکرێت و نابێت چارەنووسی خەڵکی کوردستان لە مەترسییدا بێت، بەهۆی چەند کەسێک یاخود لایەنێکی سیاسیەوە، بۆیە دەبێت لایەن سیاسیەکان بەرژەوندیەکانیان وەلاوەبنێن، چارەنووسی گەلی کورد، بەگرنگتر بزانن و شۆڕشی کوردایەتی بکەن بەرامبەر بە دووژمنان.
بەختیار کەمال، پیلانگێڕیی داگیركەرانی دژ بە گەلی كورد بۆ بێ پلانی دەسەڵاتدارانی هەرێم و دووژمنایەتیکردنی لایەنەکان لە ناوخۆدا گەڕاندەوە و وتی: دەبێت بتوانرێت دەستەڵاتداران، پلانیان هەبێت لە چۆنیەتی بەرێوەبردنی خاکی کوردستان و ژیانی خەڵکی کوردستان، چونکە لە نەبووونی پلان لە بوارەکانی بەرێوەبردندا، دووژمنان و نەیارانی کورد پلانگێڕیی دژی کوردستان ئەنجام دەدن و خاک داگیر دەکەن.
س.س
