مامۆستایانی زانكۆی هەڵەبجە، پشتگیری هەر هەوڵێكن هەبێت بۆ دەرهێنانی پەكەكە لە لیستی تیرۆر و جەختدەكەنەوە، ئەو موبەریرانەی پەكەكەی پێ خراوەنەتە لیستی تیرۆرەوە خاترگرتنی دەوڵەتی توركە و دەشڵێن: دەرهێنانی پەكەكە لە لیستی تیرۆر خزمەت بەدۆزی نەتەوەی كورد دەكات لەتەواوی دونیادا.
لە ڕۆژی ١٣ی ١٢ی ٢٠٢١ەوە كەمپەینێك بۆ دەرهێنانی پەكەكە لە لیستی تیرۆر دەستیپێکردووە و هەزار ڕۆشنبیر و کەسایەتیی جیهان واژۆیان لەسەر کردووە، کەمپەینەکەش بەناونیشانی “با پەکەکە لە لیستی تیرۆر دەربهێندرێت” لە ٣٠ وڵاتی جیهانەوە واژۆی بۆ کۆکراوەتەوە، لەو چوارچێوەیەدا مامۆستایانی زانكۆی هەڵەبجە، پشتیوانیی خۆیان بۆ هەر هەوڵێكی دەرهێنانی پەكەكە لە لیستی تیرۆر دەردەبڕن.
هۆشمەند عەتا، مامۆستا لە بەشی زانستە كۆمەڵایەتییەكان دەڵێت: پەکەکە پارتێكی نیشتیمانیی كوردستانییە، هەوڵەكانی بۆ ناساندن و چارەسەركردنی كێشەیی نەتەوەی كوردە، بەڵام ئەوەی جێگەی داخە بەهۆی ئەو كێشانەی لەگەڵ توركیا هەیەتی خراوەتە لیستی تیرۆرەوە.
ئەو مامۆستایەی زانكۆ هەر هەوڵێكی بۆ دەرهێنانی پەكەكە لیستی تیرۆر بەگرنگ زانی و وتی: دەرهێنانی پەكەكە لە لیستی تیرۆر ڕەوایەتیی زیاتر دەدات بەحزبەكە و دەستكراوەتری دەكات بەچالاكییە نێودەوڵەتییەكانی و پرۆسەیەكی دیكە دەكاتەوە بەڕوی كوردا لە باكووری كوردستان.
هەروەها، ئوسامە ئەشرەف، مامۆستاى زانكۆی هەڵەبجە لەسەر ئەو پرسە بە ڕۆژنیوزی وت: تێڕوانینی من بۆ پارتی كرێكارانی كوردستان، تێڕوانینێكی نەتەوەییە، پەكەكە بزوتنەوەیەكی ڕزگاریخوازە بۆ مافی نەتەوەی كورد بەردەوام لە هەر چوار بەشی كوردستان خەبات و تێكۆشان دەكات، دەرهێنانی لە لیستی تیرۆردا خزمەت بەتەواوی بزووتنەوەی ڕزگارییخوازی گەلی كورد دەكات لە تەواوی دونیادا.
“ئەو بەهانانەی پەكەكەی پێ خراوەنەتە ناو لیستی تیرۆرەوە، بەهانەی نێودەوڵەتیین نەك واقعیی، واتا خاترگرتنی دەوڵەتی توركە، دەرهێنانی لە لیستی تیرۆردا پێویستە بابەتێك بێت ئەمەریكا زۆر بەجدیی كاری لەسەر بكات، بزانرێت ئەو كردەوانەی پەکەکە گوایە تیرۆریستییە بەراورد بەكردەوە تیرۆریستییەكانی دەوڵەتی تورك بكرێت، ئەو كاتە زۆربەئاسانیی دەتوانرێت پەكەكە دەربهێندرێت لەلیستی تیرۆردا، بۆیە ئەوەی دەوڵەتی تورك دەیكات كردەوەی تیرۆریستییە نەك پەكەكە” ئوسامە ئەشرەف واى وت.
ئەو مامۆستایەی زانكۆ، پشتیوانیی خۆشی بۆهەر هەوڵێك دەربڕی، كە كار بۆ دەرهێنانی پەكەكە بكات لە لیستی تیرۆردا، دەخوازێت قۆناغەكانی پرۆسەی ئاشتیی و دانوستانەكان لەگەڵ دەوڵەتی تورك دەست پێبكاتەوە، بۆ ئەوەی خزمەتی هەموو كوردانی باكوور و ڕۆژئاوا بكرێت.
س.س
