میترۆ داوای ئازادکردنی دەستگیرکراوان بەبێ مەرج دکات

دژی دەستگیرکردنی چالاکوانان ، ڕۆژنامەنووسان، هاوڵاتیان و نوێنەری لایەنەسیاسییەکان، کە دوێنێ لەلایەن ئاسایشی سلێمانییەوە دەستگیرکران، سەنتەری میترۆ بۆ داکۆکیکردن لە مافی ڕۆژنامەنووسان، ڕاگەیەندراوێکی بڵاوکردەوە، تێیدا ڕایگەیاندووە: داوا دەكەین دەسبەجێ دەسبەسەركراوەكان بە بێ مەرج ئازاد بكرێن.


دوێنێ لە سەکۆی ئازاد لە پارکی ئازادی شاری سلێمانی، بڕیاربوو فیلمێک لەسەر شەهید ساکینە جانسز بەڕێوەبچێت، بەڵام ئاسایشی سلێمانی ڕێگریی کرد و زیاتر لە ٥٠ کەسی دەستگیرکرد، هەروەها لە ڕۆژانی ڕابردوودا چەندین چالاکوانی مەدەنی لە سنووری پارێزگای سلێمانی دەستگیرکراون، لە دژی ئەو دەستگیرکردنانە، ئەمڕۆ سەنتەری میرۆ ڕاگەیەندراوێکی بڵاوکردەوە.

لە ڕاگەیەندراوەکەی میترۆدا هاتووە:"فەرزكردنی كۆت ‌و بەند لەسەر فەزای مەدەنی هەوڵێكی شكستخواردووی هێزە ئەمنییەكانە بۆ بێدەنگكردنی خەڵك لە ئاست ئەو پێشێلكارییانەی بەرامبەر بە مافی مرۆڤ دەكرێت، سەنتەری میترۆ بە نیگەرانییەوە چاودێری ئەو هەڵمەتە دەكات كە بە شێوەیەكی فراوان لە شارەكانی سلێمانی ‌و كەلارو قەڵادزێ دەستیپێكردووە، دەیان چالاكوانی مەدەنی ‌و هەڵسوڕاوی سیاسی دەسبەسەركراون، هەندێكیان بە كەفالەت ئازادكراون‌ و ئەوانیتر جارێ دەسبەسەرن.".

نیترۆ ڕایگەیاندووە، کە هێزە ئەمنییەكان لەو شارانەدا هەڵدەكوتنە سەر هەر چالاكییەكی مەدنی كە پەیوەندیدارە بەو هێزانەی دژایەتی حكومەتی توركیا دەكەن، ڕاشیگەیاندووە "خۆپیشاندان ‌و گردبوونەوەیان لەو چالاكوانانە قەدەغەكردووە، تا كار گەیشتە داخستنی هۆڵی سینما سالم لە شاری سلێمانی".

میترۆ دەڵێت:"هێزە ئەمنییەكان بە فەرمانی 'سەروخۆیان' هۆڵ ‌و و پاشان سیناماكەیان داخست، كە نیازی بوو فلمێك نمایش بكات،و كە چیرۆكی تیرۆكردنی ساكینە چانسز‌و هاوڕێكانی دەگێڕایەوە".

سەنتەری میرۆ سەرەنجی ڕاکێشاوەتەسەر ڕێگریی کردن لە نمایشکردنی فیلمێک لە پارکی ئازادی و ڕایگەیاندووە:"ڕۆژی هەینیش لەكاتی بەڕێوەچوونی چالاكییەكی دیکەی مەدەنی لە ناو پاركی ئازادی شاری سلێمانی دەیان چالاكوانی مەدەنی و رۆژنامەنوس ‌و هەڵسوڕاوی سیاسی دەسبەسەرن، ڕەفتاری سەركوتكردنی چالاكی مەدەنی لە شوێنێكی وەك پاركی ئازادی و "سەكۆی ئازاد" كە بیرۆكەی مام جەلال بوو، بۆ فراوانكردنی پانتایی رەخنەگرتن تا دەگاتە "جوێندان بە خۆی"، هەموو ئەوانەی كە ڕۆژانە باس لە "رێبازی مام" دەكەن، دەخاتە بەردەم بەرپرسیارێتی".

لە کۆتایی ڕاگەیندراوەکەدا، سەنتەری میترۆ رایدەگەیەنێت، فەرزكردنی كۆت‌ و بەند لەسەر فەزای مەدەنی هەوڵێكی شكستخواردووی هێزە ئەمنییەكانە بۆ بێدەنگكردنی خەڵك لە ئاست ئەو پێشێلكارییانەی بەرامبەر بە مافی مرۆڤ دەكرێت، "داواش دەكەین دەسبەجێ دەسبەسەركراوەكان بە بێ مەرج ئازاد بكرێن".

س.ح