ناوی كاندیدەكانی ئەنجومەنی پارێزگای هەڵەبجە ڕەوانەی وەزارەتی ناوخۆ كرا

بەمەبەستی دامەزراندنی كاندیدەكان بۆ پێكهێنانی ئەنجومەنی پارێزگای هەڵەبجە، ناوی كاندیدانی لایەنەکان بۆ ئەنجومەنی پارێزگا ڕەوانەی وەزارەتی ناوخۆی هەرێم كرا.


پاش ئەنجامدانی زیاتر لە ٥٥ كۆبونەوە هەفتەی ڕابردوو سەرجەم لایەنە سیاسیەكانی هەڵەبجە ڕێكەوتن لەسەر پێكهێنانی ئەنجومەنی پارێزگا بۆ شارەكە.

كاوە عەلی، جێگری پارێزگاری هەڵەبجە بۆ ڕۆژنیوز وتی: بڕیار بوو تاڕۆژی ٥ی ئەم مانگە ناوی كاندیدەكانی ئەنجومەنی پارێزگای هەڵەبجە سەرجەمیان ئاراستەی دیوانی پارێزگا بكەین بە مەبەستی دامەزراندنیان و وێنەیەكیشی بدەین بەنوسینگەی پەرلەمان، بەڵام سەرجەم لایەنەكان ناوی كاندیدەكانیان بۆ ڕەوانەكردین، جگە لەبزوتنەوەی گۆڕان.

وتیشی: بەهۆی برادەرانی گۆڕانەوە ناردنی ناوەکانمان دواخست بۆ ڕۆژی سێ‌ شەممە و دوێنێ‌ لەڕێگەی ئیمەیڵ و بەریدی تایبەتی خۆمانەوە سەرجەم ناوەكانمان بەناوی كاندیدانی بزوتنەوەی گۆڕانیشەوە ئاراستەی وەزارەتی ناوخۆ و لایەنە پەیوەندیدارەکان كرد.

سەبارەت بەناڕەزاییەتیەكانی یەكێتی لەسەر ڕێكەوتنەكە وتی: سەرجەم ڕێكەوتن و كۆنوسەكان جەمیل هەورامی وەك بەرپرسی یەكەمی یەكێتی نیشتیمانی لەسنورەكە واژۆی لەسەر كردووە، ناوی كاندیدەكانی یەكێتیش ڕەوانەی دیوانی پارێزگا كراوە بەبێ‌ هیچ دواكەوتنێك، بۆیە ئەوەی ئێمە ئاگاداربین هیچ ناڕەزایەتیەكیان دەرنەبڕیووە، لەهەر شوێنێك گرفت دروست بێت لایەنە سیاسیەكان دەتوانن چارەسەری كێشەی خۆیان بكەن، ئێمە تەنها ناوەكان ئاراستەی وەزارەتی ناوخۆ دەكەین.

ک.س