“نەبوونی پارە بۆ مووچە بەڵگەی بردنەدەرەوەی داهاتی نەوتە بۆ كڕینی موڵك لە دەرەوە”

ڕۆژنیوز- بڕوا ئەسعەد

پەرلەمانتارێکی پێشووی عێراق ڕایدەگەیەنیت، نەبوونی پارە بۆ مووچە، بەڵگەی بردنەدەرەوەی داهاتی نەوتە بۆ كڕینی موڵك لە دەرەوە دەشڵێت: ئەوەی مووچەی خەڵیکی هەرێمی کوردستان دەخوات و سامانەکەی دەباتە دەرەوە، دووژمنی خەڵکی هەرێمی کوردستانە.

دوای ئەوەی سەرەتای ئەمساڵ كڕینی ڤێلایەكی ١٨ ملیۆن دۆلاریی لە مەسرور بارزانییەوە لە ئەمریكا ئاشكرابوو، چەند ڕۆژێك پێش ئێستا ٣٠٠ موڵكی نێچيرڤان بارزانی لە ئەمریكا و دوبەی ئاشكرابوون.

ئاشكرابوونی بەشێك لە موڵكە گرانبەهاكانی سەرۆكی هەرێم و سەرۆكی حكومەت كە لە هەمانكاتدا دوو بەرپرسی باڵای پەدەكەن، لەكاتێكدایە، موچەخۆرانی هەرێم چەندین مووچە و پاشەكەوتی مووچەیان لەلای حكومەتی هەرێمە و هاوڵاتیانی هەرێم بەهۆی قەیرانە دروستكراوەكانەوە ماندووبوون.

لەوبارەیەوە، غالب محەمەد، ئەندامی پێشووی ئەنجومەنی نوێنەرانی عێراق تایبەت بۆ ڕۆژنیوز وتی:”هەرێمی کوردستان خاوەن داهاتێکی زۆرە، دوو بنەماڵە بە تایبەت بنەماڵەی بارزانی، بە دڵی خۆیان داهاتەکە بەکاری دەهێنن، بۆ مانەوەی خۆیان، بەشێکیش بۆ ئەوانەی دەییانپارێزن، بەشێکی دیکەی بۆ کۆمپانیاکانیانە، کە کار لەو بوارانە دەکەن”.

غالب محەمەد ئاماژە بە زۆریی داهاتی نەوت دەکات و دەشڵێت: هەرێمی کوردستان هەتا ئێستا نەیتوانیوە مووچەی مانگی دوو بدات، ئەمە پێمان دەڵێت پارەی هەرێمی کوردستان دەبرێتە دەرەوە و دەیدەن بە موڵک و ماڵ، چونکە بازرگانەکانی هەرێمی کوردستان بازرگانی نیشتیمانیی نین، ئەو پارەیەی  دزیوییانە، نایخەنە خزمەتی خەڵکەوە بیکەن بە پڕۆژە و کارگە.

“ئەو موڵک و ماڵانەی کڕیویانە لە دەرەوە، زۆر کەمترە لەچاو داهاتی نەوت، ئەوان کە مووچە نادەن، پارەکە دەخەنە خزمەت بنەماڵەکانەوە، ئەمانە دەستیان بە سەر موڵکی خەڵک  و حکومەتیشدا گرتووە،  مووچەی خەڵکیان خواردووە و خزمەتگوزارییان نەهێشتووە، زیاتر لە ٤٠٠ جۆر باج لە خەڵکی هەرێم وەردەگرن، سووتەمەنیی و دەرمان و هەموو شتێکیان گران کردووە لە سەر هاوڵاتیان، لە کۆتایشدا دەڵێن ئێمە ناتوانین مووچەی فرمانبەران بدەین” غالب محەمەد وای وت.

ئەو ئەندامەی پێشووی پەرلەمانی عێراق، ئاماژەی بە پەلکێشکردنی داگیرکەران کرد بۆسەر خاکی باشووری کوردستان و وتی:”ئەمانە هیچ شتێکیان بە دەستەوە نەماوە، پارێزگاریی لە هەرێمی کوردستان بکەن، جاشێتیان بۆ تورکیا و ئێران کرد، ئێستا سوپاکانیان لە ناو هەرێمی کوردستانە، بە دڵی خۆیان بۆردوومانی هەرێمی کوردستان دەکەن، ئیتر پشتیوانیشیان ناکەن، خەڵک پشتوانی لێکردن، بۆ ئەوەی لە شاخەوە بەپێی پەتی بێن، ببنە خاوەنی سەدان ملیۆن دۆلار، ئەو خەڵکەش ئێستا پشتیوانییان ناکات، هەر لە هەڵبژاردن ٧٦٪ی خەڵک بەشداریی دەنگدانی نەکردووە”.

جەختیشیکردەوە”ئەوەی مووچەی خەڵیکی هەرێمی کوردستان دەخوات، ئەوەی سامانەکەی دەباتە دەرەوە، ئەوەی دەنگە ناڕازایەکان زیندان دەکات و ئەشکەنجەیان دەدات، ئەوانەی قەڵەم بە دەستەکانمان شەهید دەکات، دووژمنی خەڵکی هەرێمی کوردستانن”.

غالب محەمەد، لە بەردەوامیی قسەکانیدا وتی”بنەماڵەی بارزانی ٨٠ ساڵە بە ناوی کوردایەتیەوە هەموو کوردیان فرۆشتووە، شۆڕشکیان تواندەوە خاوەنی ١٠٣ هەزار پێشمەرگەبوو، کە بودجەکەی زیاتر لە ٥٠ ملیۆن دیناری عێراقی بوو، کە دەیکردە زیاتر لە ٢٠٠ ملیۆن دۆلار، هەموویان لەگەڵ خۆیان بردە ئێرانەوە، ئەمانەبوون، بە ناوی شۆڕشەوە سەروەت سامانی میلـلەتیان دزیوە، ئەمانە بوونە خاوەنی باخیرە و فڕۆکەی تایبەت، بوونە خاوەنی سەدان باڵەخانە لە ئەورپا و ئەمریکا، کە ئێستا کەمی ئاشکرا بووە، داهاتی بنەماڵەی بارزانی زیاتر لە ١٠٠ ملیار دۆلارە، داهاتی بنەماڵەی تاڵەبانی ٣٠ ملیار دۆلارە، بە پێ کات هەموو سەروت سامانیان ئاشکرا دەبێت”.

غالب محەمەد، ئاماژەی بە خیانەتی ناوخۆیی پەدەکە و سیخوڕییکردن بۆ دووژمن کرد و وتی: ئەوە شەرمە شوێن و جێگەی پەکەکە دەستنیاشن بکەیت بۆ ئەوەی تورکیا بۆردومانیان بکات،  ئەوە شەرمە ٤١ سەربازگەی تورکی بهێنیتە ناو دهۆک و هەولێر، سیخوڕیی بکات، بە دەبابەوە بسوڕێتەوە، ماڵی بارزانی ژیانییان بکەوێتە مەترسیەوە هەموو هەرێمی کوردستان ڕادەست دەکەن، ئەوەشی یەکجار خۆی ڕادەست کرد، پێتان وا نەبێت ڕۆژێک شۆڕشیان کردبێت.

س.س