نەوەی نوێ ئیدانەی ڕەشبگیرییەکەی سلێمانی دەكات

​​​​​​​‎دوای ئەوەی ئەمڕۆ ئاسایشی سلێمانی ٥٢ كەسی دەستگیركرد، لە بەیاننامەیەكدا جوڵانەوەی نەوەی نوێ ئیدانەی دەستگیركردنەكان دەكات و بە مەترسیدار لە قەڵەمی دەدات.


ئەمڕۆ دوای ئەوەی بەمەبەستی نمایشكردنی فیلمی شەهید ساكینە جانسز كۆمەڵێك هاوڵاتی و نوێنەری لایەنە سیاسیی و ڕێكخراوەكان چونە سەكۆی ئازادی لە پاركی ئازادی شاری سلێمانی، ئاسایشی شارەكە ڕێگریی كردوو ٥٢ كەسی دەستگیركرد، كەتێیاندا بەڕێوەبەرانی تەڤگەریی ئازادیی و بەرەی دیموكراسی گەل هەن و زۆرینەی دەستگیراوانیش ژنن، وەك كاردانەوەیەك كەمێك لەمەوبەر جوڵانەوەی نەوەی نوێ ڕاگەیەندراوێكی بڵاوكردەوە.

لە ڕاگەیەندراوەكەدا هاتووە:”جوڵانەوەی "نەوەی نوێ‌"، ئیدانەی دەستگیركردنی خاتوو "تارا حسێن" وتەبێژی تەڤگەری ئازادیی كوردستان و نزیكەی ٥٠ كەسی دیكە دەكات، كە ئەمڕۆ لە سەكۆی ئازادیی شاری سلێمانی و لەلایەن ئاسایشی ئەم شارەوە دەستگیركراون.

هەر لە ڕاگەیەندراوەکەدا هاتووە: دەستگیركردنی وتەبێژی هێزێكی سیاسیی و نزیكەی 50 كەسی دیكە، لە شوێنێكدا كە پێیدەوترێت "سەكۆی ئازادیی" و هەروەها لەناو شارێكدا كە پێیدەوترێت "پایتەختی ڕۆشنبیریی"، هەڕەشەیەكی مەترسیدارە كە بەرامبەر بە سادەترین بنەمای ئازادیی سیاسیی و ئازادیی ڕادەربڕین لە هەرێمی كوردستان دا دەكرێت و درێژكراوەی ئەو ڕووداوانەی چەند ڕۆژی ڕابردویشە، كە ئاسایشی ئەم شارە، درێژەی بە هەمان هەڕەشە بۆ سەر ئازادیی بڵاوكردنەوە و ئازادیی كاری سیاسیی داوە و بەشێكی قەزا و ناحیەكانی ئەم پارێزگایەشی گرتووەتەوە، كە خۆی دەیبینێتەوە لە داخستنی چەندین بارەگای فەرمیی "تەڤگەری ئازادیی" و هەروەها ڕێگریكردن لە پەخشكردنی فیلمێك، كە مۆڵەتی پەخشكردنیشی هەیە  لەلایەن وەزارەتی ڕۆشنبیریی حكومەتی هەرێمی كوردستان-ەوە.

لە درێژەی ڕاگەیەندراوەکەدا هاتووە: جوڵانەوەی "نەوەی نوێ‌"، داوادەكات بەزوترین كات وتەبێژی تەڤگەری ئازادیی و كۆی ئەو كەسانەش ئازادبكرێن، كە ئەمڕۆ لە لایەن ئاسایشی سلێمانی یەوە و لە پڕۆسەیەكی ڕەشبگیریی دا و بێ‌ بونی بڕیاری یاسایی دادوەر، دەستگیركراون، ئەم كارەی ئەمڕۆی ئاسایشی سلێمانی، دژی سەروەریی یاسا و مافەكانی مرۆڤ و ئازادیی سیاسیی و ئازادیی ڕادەیربڕینە لە هەرێمی كوردستان دا.

لە کۆتایی ڕاگەیەندراوەکەدا هاتووە: "نەوەی نوێ‌"، پشتگیریی لە هەر دەنگێكی ئازاد و هەر چالاكییەكی سیاسیی دەكات، كە لەپێناو خزمەتكردندا بێت بە مافەكانی مرۆڤ و ئازادییە گشتییەكان و جێگیركردنی پایەكانی دیموكراسیی لە هەرێمی كوردستان و دژی هەر هەوڵێكیشە، كە ئەم ئازادییانە لەباربەرێت و بۆ ئەم مەبەستەیش، فراكسیۆنەكانی لە پارلەمانی كوردستان و پەرلەمانی عیراق، بەدواداچون بۆ ئەم هەڕەشانە دەكەن.

د.ع