هاوسەرۆكی هەدەپە بانگهێشتی توركیای كرد بۆ پڕۆسەی چارەسەری

هاوسەرۆكی گشتیی هەدەپە سەزای تەمەللی لە میانەی كۆنفرانسی حیزبەكەی لە هەرێمی ئیجە ڕایگەیاند، ٢٣ی حوزەیران ئەوان بوونەتە هیوایەك كە هەموو گەلی توركیا چاوەڕوانی بووە.


پارتیی دیموكراتیی گەلان (هەدەپە) لە ئیزمیر كۆنفرانسی هەرێمی ئیجەی ساز كرد، هاوسەرۆكی گشتیی هەدەپە، پەرلەمانتاران، ئەندامانی ئەنجومەنی ناوەندیی هەدەپە و هاوسەرۆك و بەڕێوەبەرانی هەدەپە لە شار و شارۆچكەكان ئامادە بوون.


لە كۆنفڕانسەكەدا هاوسەرۆكی گشتیی هەدەپە سەزای تەمەللی وتەیەكی پێشكەش كرد و ڕایگەیاند، هزرێكی بەهێزمان هەیە، لە سایەی هزرەكانی ئێمە ئەمڕۆ لە توركیا جێدەستێك دەبینرێت، ئێمە هەموو كۆمەڵگە بانگهێشت دەكەین بۆ سیاسەت، دیموكراتیی ڕادیكاڵ بەڕێكخستن و بەكۆمەڵایەتی دەكەین.


تەمەللی ڕایگەیاند، لە توركیا دەسەڵاتێك هەیە كە مافی سیاسەتكردنی مرۆڤەكان ئاستەنگ دەكات، دیارە كە ئاكەپە بەم شێوەیە وڵات بەڕێوە دەبات، ئەوەی ئێمە لە ٢٣ی حوزەیراندا كردمان ئەم سیاسەتەی هەڵوەشاندەوە، ئێمە ٢٣ی حوزەیران بووینە هیوا، ئێمە ئەو هیوایەمان دا كە هەموو گەلی توركیا چاوەڕوانی بوو، فكری هەدەپە لەپشت ئەم سەركەوتنەوەیە. ئێمە بە سیاسەتی دیموكراتی قۆناغی داهاتوومان دەستنیشان دەكەین.


هاوسەرۆكی گشتیی هەدەپە ئاماژەی بە گۆشەگیری كرد و ڕایگەیاند، بەتووندی هێرشیان كردە سەر گەلەكەمان، شارەكانی ئێمەیان وێرانكرد، پێنج هەزار هەڤاڵی ئێمە زیندانی كران، ڕۆژنامەوان، ئەكادیمیستان و هەموو ئەو كەسانەی داوای ئاشتی، ئازادی و دیموكراتییان دەكرد گۆشەگیر كران، بۆ شكاندنی ئەم دۆخە قۆناغێكی مەترسیدار هاتە ئاراوە، لە كەسایەتیی لەیلا گیوڤەندا هەزاران مرۆڤ دەستیان بە مانگرتن لە خواردن كرد. ئەم بەرخۆدانە گرنگ بوو، بەڵام لە شوێنێكی ڕاست دەستپێشخەریی سیاسیش گرنگ بوو و ئێمە ئەمەمان سەرخست، ئێمە لە ٢٣ی حوزەیراندا لەم بابەتەدا هەموو توركیامان خستە سەر پێ، با لەگەڵیشمان نەبن، ئێمە كۆمەڵگەمان بۆ زەمینەی دیموكراتی ڕازی كرد.


سەزای تەمەللی ڕایگەیاند، پێویستە بە درووشمی شكاندنی فاشیزم ئەم پڕۆسەیە بەڕێوە ببەین، بەپێچەوانەوە فاشیزم هەموو وڵات گەمارۆ دەدات.دەبێ بۆ داهاتوو هەنگاو بنێین، تەنیا بەم شێوەیە دەتوانین ڕێگەی داخراوی توركیا بكەینەوە، بەڕێز ئۆجالان بۆ كێشەكانی توركیا چارەسەری خستە ڕوو، پێویستە لەگەڵ ئەو گفتوگۆ بكەین، ئەوانەی ئەمڕۆ جڵەوی سیاسەتیان لەدەستە پێویستە دەستپێشخەری بكەن. دەبێ بۆ چارەسەری كێشە هاوبەشەكانی خۆمان پێكەوە چارەسەری بێنینە ئاراوە. ئێمە بانگهێشتی هەموو توركیا دەكەین بۆ تێكۆشان لە دژی فاشیزم و بۆ دەستپێكردنی پڕۆسەی دانوستان.


د.ح