دووشەممە, 16 يول 2018 – 09:39 ڕۆژنیوز – ناوەندی هەواڵەکان
سنوورەکانی باشوری کوردستان هەمیشە لەبەردەم داگیرکاریی تورکیا و ئێراندابووە، ئێوارەی ١٣ی ئەم مانگە، تۆپخانەكانی ئێران تۆپبارانی كوێستانی گوندەژۆری سەر بەشارۆچكەی چۆمانیان لە دەڤەری باڵەکایەتی لە سنووری پارێزگای هەولێر کرد، کە بووەهۆی ئاوارەبوونی سەدان کەس، لێرەدا بەشێک لە ئاوارەکانی ئەو سنوورە بۆ ڕۆژنیوز دەدوێن.
گەلاوێژ یوسف كە كوڕەكەی بەهۆی تەقەی سوپای پاسدارانەوە برینداربووە، دەلێت: ئێران بەبێ هیچ هۆیەك تەقەی لە كوڕەكەم كردووەو برینداربووە، هەروەها نزیكەی ١٥ سەر لە مەڕەكانی ئێمەی كوشتووە، بەبێ ئەوەی ئێمە هیچ تاوانێکمان هەبێت.
گەولاوێژ دەشڵێت: سەركردەو دەسەڵاتدارانی كورد خۆیان بێدەنگ كردووە لە ئاست ئەو پێشێلكاریانە، تا دێت حكومەتە داگیركەرەكانیش دەستدرێژیمان دەكەنەسەر، بۆیە داواكارین ئەو تۆپباران و تەقەكردنەمان لەسەر بوەستێنن و حكومەتی هەرێم و حكومەتی عێراق هەڵوێستان هەبێـت.
هەروەها خالید ئەحمەد یەكێكە لەو كۆچبەرەكانی باڵەكاتی کە لە كونەرێی و گۆمەهیشك كە ناوچەی سنوروین و ئیران تۆپبارانی دەکات، دەڵێت: بەهۆی تۆپبارانی ئێرانەوە ترس و دڵەڕاوكێ لەناو باخدارو ئاژەڵدارانی سنوورەكە دروستبووەو ماڵ و ژیانی خۆمان بەجێهێشتووەو ئاوارەبووین.
خالید وتیشی: ئەو پێشێلكاریانە بە بێ هۆ دەكرێنە سەر خاكی كوردستان و كاسبكاران، ئێمە لەناو خاكی خۆمانین بەبێ ئەوەی هیچ شوێنیکمان داگیرکردبێت، یان سنوورمان بەزاندبێت، بەڵام ئەوان دەمانكوژن و ئاوارەمان دەكەن.
مشیر نەبی یەكێكی دیکەیە لە هاوڵاتییانی سنوورەکە و وتی: هەموو ساڵێك لەو وەرزەو لەم كاتەدا كە ئاژەڵدارو گوندنشینان كە ئیش و كارەكانی خۆیان دەكەن لە كوێستانەكان، ئیران تۆپبارانی سنوورەكە دەكات و بەبێ جیاوازی خەڵك دەكاتە ئامانج.
دەشلێت: خەڵكی ئێرە هەمووی ئاوارەبووەو ماڵی خۆیان جێهێشتووە، بۆیە داواكارین حكومەت و یەكەی ئیداریی سنوورەكە و حكومەتی عێراق بینە دەنگ لەسەرمان.
جەواهیر رەجەب-یش یەكێك لەو ژنە ئاژەڵدارانەی سنوورەکەیە و وتی: ئێران بە بەردەوامی تەقەی لە شوان و كوڕو كەسی ئێمە كردووە، بۆیە داواکارین بەبێ هیچ هۆكارێك ئاوارە نەبین و ڕۆڵەكانمان نەبنە قوربانی.
س.ح
