هاوڵاتیانی سۆران: كڕینی كاڵای تورك پارەدانە بە دوژمنەکەت بۆ لەناوبردنی خۆت

دانیشتوانی سۆران هەڵمەتی بایكۆتی كاڵای توركی بە زۆر گرنگ لەقەڵەم دەدەن و پێیانوایە، کەسێک نەتوانێت دژی داگیرکەر چەک هەڵبگرێت دەتوانێت بە بایکۆتی کاڵاو درامای تورکی پشتیوانی بگەیەنێت، دەشڵێن: كڕینی كاڵای تورك وەك ئەوە وایە خۆت پارە و چەك بۆ لە ناوبردنی خۆت بدەیتە دووژمنەكەت.


بایکۆتی کاڵاو درامای تورکی لە باشوری کوردستان بەردەوام فراوانتر دەبێت، لەو چوارچێوەیەدا دانیشتوانی شارۆچکەی سۆران لە پارێزگای هەولێر بۆ ڕۆژنیوز دەدوێن و وێڕای بایکۆت، داوا دەکەن بەرهەمی ناوخۆ ببوژێندرێتەوە.

هەردی عەباس فرۆشیاری بۆن و جوانكاریی، باسی لەوە کرد، کە جگە لە کاڵای تورکی کاڵای چەنیدن وڵات لە بازاڕەکاندا هەن، وتیشی زۆرکەس دەچێتە لایان و دەڵێت تورکیم ناوێ، دەشڵێت دەبێت هەمووان بزانن، کە "ساڵانە قەبارەی بازرگانی هەرێم و توركیا كە  نزیكە ١١ ملیار دۆلاربووە، دڵنیابن ئەم پارەیە هەمووی دەدرێت بە چەك دواتر دژی كوردی بەكاردێت".

هەردی بەگرنگی زانی، کە بایکۆت بەردەوامیی هەبێت و بە هەنگاوێکی زۆر گرنگ دژی دەوڵەتی تورک لە قەلەمیدا.

ئاغا حوسێن پێشمەرگەیەکی دێرینە، پێیوایە هەرکەسێک نەشتوانێت بە چەك بەرگری بكات دەتوانێت بە ڕێگای بایكۆتی كاڵا و درامای تورکی ڕێگریی لە دەوڵەتی تورک و کلتوری تورکی بکات.

ئەو پیشمەرگەیە دەڵێت بایکۆتی ڕاگەیاندووە و بەردەوامیش دەبێت، دەشڵێت: كڕینی كاڵای تورك وەك ئەوە وایە خۆت پارە و چەك بۆ لە ناوبردنی خۆت بدەیتە دووژمنەكەت، چونكە هەمووان دەزانین كە توركیا و ئێران دوو وڵاتن هەمیشە دژ بە گەلەكەمانن، نابێت ئێمەش ببینە هۆی بەهێزییان.

هەروەها كۆڤان حەوێز-ی چالاکوان دە چالاكوان پێی وایە، کە دەوڵەتانی داگیرکەری کوردستان سود لە خودی کورد وەردەگرن بۆ هێرشەکانیان، دەشڵێت: پێویستە هەر تاكێك بڕیار بدات كە چۆن دەتوانێت سود لە ئەقل و توانا و بەرهەمی خۆی وەرگرێت بۆ پڕكردنەوەی پێداویستییەكانی بۆ پابەندبوون بە هەڵوێستێكی گشتگیری نەتەوەیی و سیاسی دژ بە وڵاتێكی داگیركەر".

كۆڤان دەشڵێت: بەڵێ بۆ بایكۆتی بەرهەمی هەموو ئەقڵ و بیركردنەوەیەك كە  دووبارە لە خزمەتی مرۆڤایەتی بەكارنەهێندرێت و بكرێتە ئامرازی سەركوتكردنی ئازادیخوازان و كۆمەڵكوژكردنی مرۆڤایەتی.

س.ح