هاوڵاتیانی شەنگال بە ئاماژەدان بەوەی کە پەدەکە چۆن شەنگالی فرۆشتە داعش، ئێستا باشووریشی فڕۆشتووەتە تورکیا، ڕایانگەیاند: وەکوو خەڵکی ئێزدی تا کۆتایی بەرخۆدان دەکەین و پشتیوانی گەریلا دەبین.
هاوڵاتیانی شەنگال لەسەر هەڵویستی پەدەکە لەدژی یەکێتی نەتەوەیی و جموجوڵی هێزەکانی لە هەرێمەکانی پاراستنی مەدیا، بۆ ڕۆژنیوز دەدوێن.
هاوڵاتییەک بەناوی شێخ دەروێش دوای دەربڕینی پشتیوانیی خۆی لە بەرخۆدانی گەریلا دژی دەوڵەتی تورک، وتی: چۆن شەنگال فرۆشرا، ئێستاش خاکی باشووری کوردستان دەفرۆشرێت، بۆ ئێزدیان چوارپارچەی کوردستان یەکێکە و لە چ شوێنێک بەرخۆدان هەبێت، ئێمەش پشتیوانیی لێدەکەین، چونکە دوژمنی هەموومان یەکێکە.
لەسەر هەڵویستی پەدەکەش، شێخ دەروێش وتی: بێدەنگی بە واتای هاوبەشی لە داگیرکارییە، ئەگەر وانەبێت، دەتوانن خاوەن هەڵویست بن، خۆشیان ناتوانن با داوای هاوکاری لە عێراق بکەن.
گەنجێک بەناوی ملحەم بەرەکات ئەو پارتانەی پشتیوانی لە دوژمن دەکەن شەرمەزاردەکات و دەڵێت: وەک گەنجانی ئێزدی ئامادەین ئەرک و بەرپرسیارێتیمان لەدژی داگیرکاریی جێبەجێی بکەین، کێی هاوکاریی ئێمەی کردووە ئێمەش تا کۆتایی لەگەڵیان دەبین، بۆیەش سڵاو لە بەرخۆدانی گەریلا دەکەین، گەریلا ئێمەی لە مردن ڕزگار کرد، هیچکات لەبیری ناکەین و لەگەڵیاندا شەڕی داگیرکەر دەکەین، وەک کۆمەڵگای ئێزدی شەڕمان ناوێت، بەڵام ئەگەر دوژمن بەنیازی لەناوبردنمان بێت، لە هەر شوێنێک بێت لە بەرامبەریدا بەرخۆدان دەکەین.
ب.ک
