هاوڵاتیانی شارۆچکەی ڕانیەی ناوەندی ئیدارەی ڕاپەڕین بە پێویستی دەزانن، گەلى کورد چیتر بێدەنگ نەبێت لە ئاست هێرش و داگیرکارییەکانی دەوڵەتى تورک و ڕژێمى ئێران و دەشڵێن: تا کورد یەکگرتو نەبێت، ئەوا ناتوانێت بەر لە هێرش و داگیرکارییەكان بگرێت.
هێرشە داگیركارییەكانی دەوڵەتی تورك بۆسەر هەرێمی كوردستان و ڕۆژئاوای كوردستان بەردەوامە، دەوڵەتی تورك نیازی خۆی نەشاردووتەوە لە داگیركركدنی خاكی كوردان، بۆیە هاوڵاتیان یەكگرتویی و یەك دەنگی كورد بە شاڕێگای سەرەكی دەزانن بۆ بەرگرتن بە داگیركارییەكانی دەوڵەتی تورك.
لەوبارەوە، شۆڕش غەفور، هاوڵاتیەکی ڕانیەیە و بە ڕۆژنیوزی وت: پێویستە گەلى کورد چیتر بێدەنگ نەبێت لە ئاست هێرش و داگیرکارییەکانی تورکیا و ئێران و هەڵوێستی جدیان هەبێت، بێدەنگی بێ هەڵوێستی گەل دوژمنانی دەست کراوەتر کردووە لە هێرشەکانیان بۆ سەر گەلەکەمان .
ئەوهاوڵاتیە باس لەوەشدەکات، لایەنە سیاسیەکان لەناو خۆیاندا یەک گرتو و یەک ڕیز نین، ئەمەش وای کردووە، کە ئێمە باجی قوڕس بدەین و وتی: باشترین ڕێگا چارەش بۆ دەرباز بوون لەم دۆخە یەکگرتووی و یەکڕیزی گەلی کوردە، تا یەکگرتوو یەک دەنگ و یەک هەڵوێست نەبین، ئەوا ناتوانین خۆمان و گەلەکەمان بپارێزین .
هەروەها، ڕێبوار ئیبڕاهیم، هاوڵاتیەکی دیکەى شارۆچکەی ڕانیە و باس لەوە دەكات، هێرشەکانی تورکیا بووەتە مەترسیەکی گەورە بۆ سەر ژیانی هاوڵاتیان و دەڵێت: توركیا دەیەوێت هەیمەنەی خۆی بەسەر ناوچەکەدا بسەپێنێت، بەڵام خەیاڵیان خاوە و بە هەموو شێوازێک ئێمە ڕووبەڕوویان دەبینەوە .
دەشڵێت: پێویستە هەموو تاکیکی ئەم گەلە هەڵوێستی هەبێت و بێتە دەنگ و هەڵوێستی هەبێت و چیتر قەبوڵ نەکات، کە هێرش بکرێتە سەر گەل و خاکەمان و ناڕەزایەتی دەربڕێت لەناوخۆ و لەدەرەوەی وڵاتیش لۆبی بکرێت، هەروەها، لەبەر دەم یوئێن و ئەنجومەنی ئاسایشی ناڕەزایەتی دەر ببڕێت و تاکو فشار بخرێتە سەر دەوڵەتی داگیركەر تورك، تا چیتر هێرش لەشکر کێشی بۆسەر باشوور و ڕۆژئاوای کوردستان نەکات.
س.س
