یەكشەممە, 21 يون 2020 – 07:12 ڕؤژنیوز ـ هاوڕێ كرێكار
سه‌ره‌ڕای به‌رده‌وامی بۆردوومانەکان، دەوڵەتی تورك ماوه‌ی چه‌ند ڕۆژێكه هێرش و پەلامارەکانی بۆ سه‌ر خاكی باشووری كوردستان چڕ كردووەتەوە و بەهۆی هێرشە دڕندەکانیشیەوە لە ڕۆژانی ڕابردوودا چەندین هاوڵاتی شەهیدبوون، ئه‌مه‌ش هاوڵاتیان و توێژه جیاجیاكان و به‌شێك له حیزبه‌كانی نیگه‌ران كردووه، هاوڵاتیانی سنوری ئیداره‌ی گه‌رمیان لە پارێزگای سلێمانی، له‌و باره‌یه‌وه بۆ ڕۆژنیوز قسهیان کرد.
سۆران سادق، هاوڵاتی، پێیوایە شه‌رمه‌زارییه بۆ ده‌سه‌ڵاتی كوردی له‌باشووری كوردستان، به به‌رچاویانه‌وه توركیا هێرش ده‌كاته سه‌ر بست بەبستی خاكی باشوور به‌ڵام بە هیچ شێوه‌یه‌ك فزه‌یان لێوه نایه‌ت و بێده‌نگیان هه‌ڵبژاردووه و خۆشیان ناکەن بە خاوه‌نی خاك، ئه‌مه‌ش نیشانه‌ی كویله‌بوون و زه‌لیل بوونی هه‌رسێ سه‌رۆكایه‌تیه‌كه‌یهی هەرێمە بۆ توركیا.
سۆران، وتیشی: توركیا به بیانووی گه‌ریلاكانی پارتی كرێكارانی كوردستان له‌ناو خاكی هه‌رێم، هێرش و په‌لاماره‌كانی چڕكردوه‌ته‌وه بۆ سه‌ر باشوور، بەڵام توركیا ئامانجی داگیركردنی خاكی كوردستانه و سه‌ركردایه‌تی كوردیش بێده‌نگه و ناشتوانن له‌به‌ر به‌رژه‌وه‌ندییه‌كانیان قسه بكه‌ن.
شه‌ماڵ قادر، هاوڵاتیه‌كی دیکەی دانیشتووی شارۆچكه‌ی كه‌لاره، دەربارەی پەلامارەکان وتی: توركیا دوژمنی له‌مێژینه‌ی گه‌لی كورده و هه‌رگیز حه‌زی به دۆستایه‌تی كورد نه‌بووه و نابێت و ئه‌گه‌ر ئێستاش له‌گه‌ڵ به‌شێكی كوردا دۆست بێت، ئه‌وه ته‌نها بۆ به‌رژه‌وه‌ندی ئابوورییه، ئه‌گینا دڵسۆزیی و وازهێنان نیه له‌ڕقی چه‌ند ساڵه‌ی.
وتیشی: ئه‌و هێرشانه‌ی ئێستا توركیا ده‌یكاته سه‌ر باشووری كوردستان بێگومان هەموو ئەوە، ته‌نها بۆ سه‌ر پارتێكی دیاریكراوی وه‌ك پارتی كرێكارانی كوردستان نیه، به‌ڵكو هێرشه بۆ سه‌ر گه‌لی كورد و بست به بستی خاكه‌كه‌ی، به‌داخه‌وه گه‌لی ئێمه بێده‌نگه له ئاست ئه‌و داگیركارییه.
سیروان سلێمان، هاوڵاتی، وتی: وه‌زیری ده‌ره‌وه‌ی عێراق ڕاسته كورده، به‌ڵام نوێنه‌ری پارتی دیموكراتی كوردستانه، كه دۆست و شه‌ریكی ده‌وڵه‌تی داگیركه‌ری توركه، نه‌ك هه‌رێمی كوردستان، ئه‌گه‌ر عێراقیش داگیر بكات یه‌ك وشه‌ی له‌ده‌م ده‌رناچێت و بۆشی نیه یه‌ك قسه بكات بێ فەرمانی سه‌ركردایه‌تی حیزبه‌كه‌ی.
هه‌ره‌وه‌ها ئەوەی خستەڕوو کە پارتی دۆستی زۆر نزیكی توركیایە و زۆر جار ئامانج و پلانی ئه‌و جێبه‌جێ ده‌كات، ئەو هەموو پاشەکشە و سازشەی پارتی، کوردی لەهەر چوار پارچەی کوردستانی خستووەتە مەترسییەوە.
ک.س
