هاوڵاتیانی هەولێر بێ ئومێدن لە حکومەتی داهاتووی عێراق، لەگەڵ ئەوەشدا داوادەکەن، کورد لە بەغدا یەکگرتوو بێت.
سەرەرای ناکۆکیی نێوان لایەنەکان، هەوڵەکان بۆ پێکهێنانی حکومەتی نوێی عێراق بەردەوامە، نانکۆکیی تەنیا لەنێوان کورد-سوننە و شیعەدا نییە، بەڵکو شیعە و کوردیش لەناوخۆدا پارچەبوون و لەناو کوردیشدا زۆرترین ناکۆکیی لەسەر پۆستی سەرۆک کۆمارە لەنێوان یەنەکە و پەدەکەدا.
هاوڵاتیانی هەولێر سەرنجی جیوازیان هەیە لەسەر حکومەتی داهاتووی عێراق، ڕەسوڵ حەمەد هاوڵاتیەکی دانیشتووى شاری هەولێرە و وتى: هیچ ئومێدیک لە حکومەتی داهاتووی عێراق بەدی ناکەم، تەنها ڕووخسارەکان دەگۆردەرێن.
هۆکاری بیئومیدیی ئەو هاوڵاتییە دەگەڕێتەوە بۆ ئەوەی”حکومەتەکانی پێشوو هیچیان نەکردووە بۆ هاوڵاتیان، وەک دابیننکردنى خزمەتگوزارییەکان و دانیشتوانى ئەم وڵاتەش لە بارودۆخێکی خراپدان”.
ئەو باس لەوە دەکات، کە کورد لە بەغدا نەک هیچیان بۆ خەڵک نەکردووە، بەڵکو خۆشیان یەکگرتوو نین و دەڵێت: هاوڵاتیانى کوردستان بە گرنگی دەزانن، کە لایەنە کوردییەکان یەک دەنگ بن لە بەغدا، بەڵام ماوەی ٣٠ ساڵە کورد هەر یەکگرتوو نەبوون.
فەرهاد حەمەد ئەمین هاوڵاتیەکى دیکەیە و هیوا دەخوازێت، حکومەتی داهاتووی عێراق مافەکانى گەلى کورد دابین بکات.
فەرهاد حەمەد ئەمین داواشیکرد: کە لایەنە کوردییەکان لە بەغدا یەکگرتوو یەکڕیزبن بۆ ئەوەی مافەکانی گەلی کورد و مووچەخۆران بەدەست بێنن.
وەهاب چەتۆ هاوڵاتیەکى دیکەیە و باسی لەوەکرد: کە هیچ هیوا و ئومێدم بە حکومەتی داهاتووی عێراق نییە، چونکە زۆر حکومەتى پێشووى عێراقمان بینیووە، بۆیە جێگای متمانە و خاوەن بڕیارنین.
ئەو هاوڵاتییە وتیشى: هێزی کورد لە یەگرتندایە و داوا دەلەم یەکگرتووبن، تاوەکو بگەنە ئامانج و مافەکانی نەتەوەکەمان.
ڕۆژی ٩ى ئەم مانگە لە یەکەم کۆبونەوەی خولی پێنجەمی ئەنجوومەنی نوێنەرانی عێراق، سەڕۆکی پەرلەمان و دوو جێگرەکەی هەڵبژێردران و لە ئێستادا لایەنە سیاسییەکان لە هەوڵی ئەوەدان، کە گەورەترین کوتلەی سیاسی دروست بکەن، تاوەکو بتوانن حکومەتی داهاتووى عێراق پێکبێنن و بۆ ئەو مەبەستەش هەوڵەکان و کۆبوونەوەکانیان بەشێوەیەکى چڕ دەستپێکردووە.
ئ.م
