ڕۆژنیوز- ڕاپەڕین
هاوڵاتیانی شارۆچکەی قەڵادزێ ڕایدەگەیەنن، ئامانج لە هێرش و داگیرکاریەکانی دەوڵەتی داگیر کەری تورکیا هەموو گەلی کوردە و دەڵێن: تا ڕێبەر ئۆجالان ئازاد نەکرێت کۆتایی بەم هێرش و داگیر کارییە نایەت و ڕۆژهەڵاتی ناوەڕاست ئارامیی بە خۆیەوە نابینێت
لە ناوەڕاستی مانگی نیسانەوە، دەوڵەتی تورك هێرشێكی بەرفراوانی داگیركاریی بۆسەر هەرێمی كوردستان دەستپێكردووە، لەوكاتەوە تائێستا جەنگێكی قورس لە نێوان هێزەكانی پاراستنی گەل و سوپای داگیركەری توركدا بەڕێوەدەچێت و بە وتەی دۆران كاڵكان، ئەندامی كۆمیتەی بەڕێوەبەری پەكەكە نزیكەی هەزار سەربازی تورك لە ماوەی دوو مانگی ڕابردوودا كوژراون.
هاوڵاتیان لەگەڵ داواکاریی ڕاگرتنی هێرشەکانی دەوڵەتی تورک، داوای ئازادیی ڕێبەری گەلی کورد عەبدوڵا ئۆجالان دەکەن و پێیانوایە، بە ئازادیی جەستەیی ڕێبەر ئۆجالان شەڕ كۆتایی دێت.
شەماڵ ئەحمەد، هاوڵاتییەکی شارۆچکەی قەڵادزێیەوە لە بارەی ڕۆڵ و کاریگەریی ڕێبەر ئۆجالان لە سەر دۆزی کورد دەڵێت: بوونی سەرکردەیەکی کاریزمای وەکو ڕێبەر ئۆجالان کاریگەریی زۆرگەورەی لە بزاڤی نەتەوەی کورد و دۆزی گەلی کورد هەیە و دەبینی، کە تاکی کورد بە بەراورد بە پێش هاتنی ئۆجالان بەرەو پێشچوونی زۆریی بە خۆیە بینیوە.
باس لەوەش دەکات، ئازاد بوونی ڕێبەر ئاپۆ بۆ گەلی کورد زۆر زۆر گرنگە و ئەرکی هەر تاکێکی کۆمەڵگایە، کە لەپێناو ئازادکردنی هەنگاوی جددیی بنێت .
دەربارەی هێرشەکانی دەوڵەتی داگیرکەری تورکیا و هەڵوێستی لایەنە سیاسییەکانی باشوور وتی: ئێمە نابێت چاومان لە دەسەڵات و لایەنە کوردیەکان بێت و پێمان وابێت، کە ئەوانە بەرهەڵستیی و پەرچە کردار دەنوێنن، دەبێت تاکی کورد بەرچاو ڕوونتر و ڕووناکبیرتربێت، ئێمە وەك تاک دەبێت چوارچێوەی کارەکانمان و هەماهەنگی زیاتر مان هەبێت هەر یەکێک لە جێی خۆیەوە هەست بە بەرپرسیارێتی بکات و پێی وانەبێت، کە ئەو هێرشە بۆسەر بەشێکی کوردستان و پەکەکە یە بەڵکو ئامانجی لە ناو بردنی هەموو گەلی کوردستانە .
قادر ئەحمەد، هاوڵاتیەکی تری شارۆچکەکەیە و بەڕۆژنیوزی وت: ئامانجی تورکیا لە داگیر کردنی خاکی کوردستان هێرشکردنە سەر گەریلا و لاوازکردنی گەریلایە و لێدانە لە پێگەی هەرێمی کوردستان وە بە لاواز بوونی پێگەی گەریلا لە ناوچەکە، هەرێمی کوردستان دەکەوێتە دەستی دووژمنان.
لەبارەی ئامانجی هێرشەكانی دەوڵەتی توركەوە دەڵێت: ئامانجی تورکیا لەم ئۆپەراسیۆن و هێرشانە تەنیا لێدان نییە لە پەکەکە و گەریلا بەڵکو لێدانە لەگەلی کورد و ئەو قەوارەیەی کە لەباشور هەیە.
جەختدەكاتەوە، تا ڕێبەر ئۆجالان ئازاد نەکرێت چارەسەری دۆزی کورد ناکرێت و هێرش و داگیرکاریی لەسەر تەواوی گەلی کورد بەردەوام دەبێت و ئازادیی گەلی کورد و گەیشتەنە ئامانج بەندە بە ئازادکردنی بەڕێز ئۆجالان.
س.س
