ڕۆژنیوز-سۆران
هاوڵاتیانی سۆران، ڕایدەگەیەنن، بەشێك لەلایەنە سیاسییە دەسەڵاتدارەكانی هەرێمی كوردستان پەنایان بردووەتە بەر دوژمنێكی وەك توركیا، ئەوەش تەنیا لەپێناو مانەوەی خۆیان لەسەر كورسیی دەسەڵات و دەڵێن: هەر لایەنێك و هاوكاریی توركیا و بەرگریی لە سیاسەتەكانی بكات، لە داهاتوودا خۆی دەبێتە قوربانی
دوای هێرش و لەشكركێشی دەوڵەتی تورك لە ناوەڕاستی مانگی نیسانی ئەمساڵدا، بەشداریی و ڕەنگدانەوەی هێزەكانی پەدەكە لەو هێرشانەی دەكرێنە سەر ناوچەكانی ئاڤاشین و مەتینا، نیگەرانی و كاردانەوەی خەڵكی كوردستانی بەدوای خۆیدا هێنا.
نیاز باڵەكی، چالاكوانی سیایسی لەسۆران بە ڕۆژنیوزی وت:، زۆرجار شێوازێك لەسیاسەت پەیڕەو دەكرێت، كە سیاسیەكانی كورد تێی دەكەون و لێی بێ ئاگان، ئەویش ئەوەیە كە دەسەڵاتداران و هێزە سیاسییەكان پەنا دەبەنە بەر دووژمن بۆمانەوەی خۆیان لەسەر كورسیی دەسەڵات، بەڵام هەركاتێک ئەو دووژمنە سەرکەوت، ئەوكاتە دەبێتە دووژمنی ڕاستەقینەی ئەو هێزەش كە وەك دۆست پشتی پێ دەبەستێت و كۆتایی بەو حزبەش دەهێنێ.
ئەو چالاكوانە هیوادارە كورد لەهەرچوار لای كوردستان بەیەكەوەبن و هاوكاریی یەكتریی بكەن و وتی: چونكە هەركاتێك دوژمنانی كورد فرسەتیان بۆ ڕەخسا كۆتایی بەهەموو كورد دەهێنن، توركیا بە ئاشكرا و بێ پەردە دەڵێت هێزێك هەیە لەناو كورد، كە هاوكارییمان دەكات بۆ هێرشكردنە سەر خاكی كوردستان، ئەوانەی خۆیان بەدۆستی تورك دادەنێن با ئەوە بزانن، كە لەداهاتوودا بەخراپ بەسەریاندا دەشكێتەوە و زیان بەخۆشیان دەگەیەنێت.
جومعە مستەفا، گەنجێكی دانیشتووی سۆرانە و دەڵێت: توركیا مەبەستی فراوانكردنی سنووری جوگرافیای خۆیەتی، خاكی ئێمەش بە پیت و فەڕە و توركیا چاوی تێبڕیوە، چونكە بۆی گرنگە و دەیەوێت دەستی بگاتە خێر و بێری ئەو سامانە سروشتییەی، كە لە خاكی كوردستاندا هەیە، بە پاساوی بوونی پەكەكە دەیەوێت بگاتەوە سنوورەكانی سەردەمی قەڵەمڕەویی دەوڵەتی عوسمانی.
ئەو گەنجەی سۆران وتیشی: هەندێك لایەنی سیاسی هەن مەبەستیان نیشتیمان پەروەری نییە، تەنیا دەیانەوێت خۆیان لەدەسەڵاتدا بمێننەوە، بۆمانەوەی خۆشیان هەموو شتێك دەكەن و دەست لەگەڵ دوژمنانیش تێكەڵ دەكەن و خیانەت و سیخوڕیی بەسەر براكانیان لەپارچەكانی تری كوردستانەوە دەكەن، هەركەسێك لێرە بەرگریی لە سیاسەتەكانی دەوڵەتی تورك بكات لە داهاتوودا خۆی دەبیتە قوربانی، بەڵام ئێستا خەڵك قوربانییە نەك ئەو هێزە سیاسییەی دۆست و هاوكاری دەوڵەتی توركە.
س.س
