دووشەممە, 2 أبر 2018 – 11:50
ڕۆژنیوز – هەڵەبجە
داگیرکارییەکانی دەوڵەتی تورک، کە بەناوی ئاینی ئیسلامەوە دەیکات لە هیچ ئاینێکدا جێگای نابێتەوە و پەیرەوانی ئاینی ئیسلام و یارسان-یش داوادەکەن چوارپارچەی کوردستان بەیەکەوە ڕووبەڕووی ئەو دەستدرێژییانە ببنەوە.
بەدرێژایی مێژوو داگیرکەرانی کوردستان بێ جیاوازیی ئاین و گەلە جیاوازەکانی کوردستان-یان بە ئامانج گرتووە و هەوڵی قڕکردنی کوردستانیانیان داوە، دەوڵەتی تورک-یش، کە یەکێک لەو داگیرکەرانەیە هەمان ئامانجی هەیە، لەم ڕاپۆرتەی ڕۆژنیوز-دا پەیڕەوانی ئاینی ئیسلام و یارسان لە شاری هەڵەبجە سەبارەت بەو بابەتە دەدوێن.
کەمال نەجمەدین، مامۆستای ئاینیی لە ڕوانگەی ئیسلامەوە باسی لە داگیرکەرییەکانی دەوڵەتی تورک کرد و وتی: لە ئیسلامدا ئەوە یەکلابووتەوە، کە هەر هێرش و داگیرکارییەک لەژێر هەرناو و پاساوێکدا بێت بۆ داگیرکردنی خاکی وڵات و گەلێکی تر بەهەموو شێوەیەک ڕێگەپێدراو نییە، بۆیە ئەوەی دەوڵەتی تورک ئەنجامی دەدات تەواو پێچەوانەی بنەماکانی ئاینی ئیسلامە.
مەلا کەمال
ئەو مامۆستا ئاینییە، وتیشی: ئاینی ئیسلام داوامان لێدەکات، کە هێرش نەکەینە سەر خاکی کەس و لە بەرامبەریشدا دەستدرێژیی هیچ لایەک قبوڵ نەکەین.
مەنزەر عەلی، یەکێک لە پەیڕەوانی ئاینی کاکەیی وتی: ئەوەی دەوڵەتی تورک ئەنجامی دەدات لەهیچ ئاینێکدا جێگەی نابێتەوە.
مەنزەر عەلی
مەنزەر، نیگەرانیی لە هەڵوێستی حکومەتی هەرێم نیشاندا لەبەرامبەر داگیرکردنی عەفرین و وتی: خاوەنی هەڵوێستی کرداریی نەبووین بۆ پشتیوانیی گەلەکەمان لە عەفرین، ئەوەش بۆ پەرتەوازەیی لایەنە سیاسییەکان دەگەڕێتەوە.
عاسى فایه‌ق، یەکێکی دیکە لە پەیڕەوانی ئاینی یارسان، وتی: ئاینی ئێمە دژی هەموو داگیرکارییەکە.
عاسى فایه‌ق
عاسی، وتیشی: دەوڵەتی تورک بەدرێژایی مێژوو، دژی گەلی کوردبووە و هەوڵی لەناوبردنی پێکەوە ژیانی گەل و ئاینە جیاوازەکانی کوردستان دەدات.
ئیبراهیم نیرگسه‌جاڕیى، مامۆستایەکی دیکەی ئاینیی سنوورەکەیە و وتی: ئەوەی دەوڵەتی تورک بەناوی ئیسلامەوە دەیکات، بێبەرییە لە ئیسلام.
ئیبراهیم نیرگسه‌جاڕیى
ئەو مامۆستا ئاینییە، بانگەوازیی بۆ یەکگرتنی گەلی کورد کرد دژ بە دووژمن و وتی: دەبێت چوار پارچەی کوردستان بەیەکەوە بۆ پاراستنی خاکەکەمان بەرخۆدان بکەین.
ش.ف
