"هیچ پێویستییەک نییە بۆ مانەوەی تورکیا لە هەرێم"

پارێزەران و مامۆستایانی زانکۆ لە سنووری سۆران، پێیانوایە، کە هیچ بیانوو و پێویستییەک نییە کە سوپای تورک لە باشوری کوردستان بمێنێتەوە، دەشڵێن، پێویستە لەسەر حکومەتی عێراق سنوورەکانی باشوری کوردستان بپارێزێت.


داگیرکارییەکانی دەوڵەتی تورک لە باشوری کورستان بەردەوامیی هەیە، هەروەها هاوڵاتیان هەمیشە داوای دەرکردنی داگیرکارییەکانی تورکیا لە باشور دەکەن، لەم چوارچێوەیەدا پارێزەران و مامۆستایانی زانکۆ لە شارۆچکەی سۆران'ی سەر بە پارێزگای هەولێر بۆ ڕۆژنیوز دەدوێن.

زانیار حەسەن پارێزەر و چالاكوانی سیاسیی پێی وایە، دەبێت لە ئێستادا دەوڵەتی عێراق فشار بخاتە سەر توركیا بۆ ئەوەی خاكی باشوری كوردستان چۆڵ بكات، دەشڵێت، "تورکیا هاتووەتە بەردەرگای ماڵەكان و سنووری خاكی باشوری كوردستانی بە قوڵاییەكی زۆر بڕیوە، بە ئارەزووی خۆی تەراتێن لە ناوخاكی هەرێم دەكات".

ئەم پارێزەرە لە ڕووە یاساییەکەیەوە دەڵێت، بە پێی دەستووری عێراق پاراستنی سنوورەكانی هەرێمی كوردستان لە ئەستۆی حكومەتی عێراقدایە، دەشڵێت، پێویستە سوپای توركیا لە هەرێم بكرێتە دەرەوە، چونكە هیچ پێویستییەك بە سوپای توركیا نییە لە ناو خاكی هەرێمدا بمێنێتەوە، "نەک کشانەوە، بەڵكو ڕۆژ بە ڕۆژ پێگە سەربازییەكانی قایمتر دەكات و ڕێژەی سەربازانی لەناوخاكی هەرێم زیاتر دەكات".

شەهلا ساڵح مامۆستا لە زانكۆی سۆران و چالاکوان، دەڵێت پێویستە هەموو تاکێکی کورد داوای کردنە دەرەوەی سوپای تورک بکات، دەشڵێت: بەپێی هەموو یاساکان نابێت هیچ وڵاتێک سەروەریی وڵاتێکی دیکە پێشێل بکات، بەڵام تورکیا و حکومەتی ئەردۆغان پابەندی ئەو یاسایەش نابن.

وتیشی داگیرکارییەکان چەندە یاسایی بن، هێندەش سیاسییە، دەنا "دەبوو حکومەتی عێراق سنوورەکانی بپارێزێت و هەرێمیش لە سنووری عێراقدایە، بەڵام بەداخەوە عێراقیش بەتەواویی بێدەنگیی بەرامبەر بە تورکیا هەڵبژاردووە".

س.ح