هێزێكی پێشمه‌رگه‌ چووە نزیک خورماتوو

بۆ پڕكردنه‌وه‌ی ئه‌و بۆشایه‌ ئه‌منیه‌ی له‌ نێوان شارۆچكه‌ی كفری و خورماتوو هه‌یه‌، هێزێكی پێشمه‌رگه‌ گه‌ڕایه‌وه‌ نێوان ئه‌و دوو شارۆچكه‌یه.


ئه‌مرۆ، هێزێكی پێشمه‌رگه‌ی میحوه‌ری قه‌ره‌ته‌په‌، گه‌ڕانه‌وه‌ سنوری ناوچه‌ی قوڕی چای نێوان شارۆچكه‌ی خورماتووی سه‌ر به‌ پاریزگای سه‌ڵاحه‌دین و شارۆچكه‌ی كفری سه‌ر به‌ ئیداره‌ی گه‌رمیان.

یەکێک لە فەرماندەکانی پێشمەرگە لە سنوورەکەوە زانیاری دایە ڕۆژنیوز و تی، کە ژماره‌یه‌ك خاڵی سه‌ربازییان له ‌نێوان ناوچه‌ی قوڕی چایی و شارۆچكه‌ی كفری زیندووكردووەتەوە، كه‌ لە دوای ڕووداوه‌كانی ١٦ی ئۆكتۆبه‌ەوە چۆڵکرابوون.

بەپێی وتەی ئەو فەرماندەیە، گه‌ڕانه‌وه‌ی ئەو هێزه‌ بۆ سنوورەکە په‌یوه‌ندی به‌ ڕێكه‌وتننامه و گفتوگۆیانەی نێوان هەرێم و بەغدا نییە، کە لەسەر گه‌ڕانه‌وه‌ی پێشمه‌رگه‌ بۆ ناوچه‌ دابڕاوەکان لە ئارادان.

ناوچه‌ی قوڕی چای نێوان شارۆچكه‌ی خورماتووی سه‌ر به‌ پاریزگای سه‌ڵاحه‌دین و شارۆچكه‌ی كفری سه‌ر به‌ ئیداره‌ی گه‌رمیانە و پانتاییەکە و هیچ شووێنکی نیشتەجێبوونی تێدانییە، پێش ڕووداوەکانی ١٦ی ئۆکتۆبەر پێشمەرگەی لێبوو، بەڵام دواتر چۆڵکرا و بووە هۆی ئەوەی ناوبەناو چه‌ته‌كانی داعش له‌و سنووره‌ جموجوڵیان هه‌بێت.

س.ح