وتەبێژی حزبوڵای عێراق ڕایدەگەیەنێت، ئەو گروپانەی پەیوەندییان بە هەواڵگریی تورکیاوە هەیە لە خورماتووەوە کێڵگە نەوت و غازییەکان هەرێمی کوردستان مووشەکباران دەکەن.
جەعفەر حسێنی، وتەبێژی کەتائیبی حزبوڵای عێراق لە تویتەری خۆی توێتێکی کردووە و ڕایگەیاندووە: بەپێی زانیارییە هەواڵگریی و ئەمنییەکانمان، گروپە ناپاکەکانی سەر بە هەواڵگریی تورکیا لە خورماتوو، بەرپرسن لە هێرشکردنە سەر کێڵگە نەوتیی و غازییەکانی هەرێمی کوردستان.
ئەوەش لەکاتێکدایە لە ٧٢ کاتژمێری ڕابردوودا سێ جار کێڵگەی غازی کۆرمۆر لە سنووری شارەدێی قادرکەرەم-ی سەر بە چەمچەماڵ مووشەکباران کراوە.
دوێنێش سدیق محەمەد، بەڕێوەبەری شارەدێی قادرکەرەم بە ڕۆژنیوزی ڕاگەیاندبوو، کە هێرشەکان لەو ناوچانەوە ئەنجامدەدرێن کە بۆشایی ئەمنییان تێدایە لە نێوان عێراق و هەرێمی کوردستان.
ب.ل
