"هێز و دەزگای دەست ڕۆیشتوو هەیە ڕێگا نادات یاساكان جێبەجێ بكرێن"

ئەندامێكی پەرلەمانی هەرێمی كوردستان ڕایدەگەیەنێت، هێزو  دەزگای دەستڕۆیشتوو لەهەرێم هەیە ڕێگا نادات یاساكان جێبەجێ بكرێن و لە خاڵە سنورییەكانیش كۆمپانیا هەیە بەناوی حكومەتەوە پارە وەردەگرێت.


ئەمڕۆ بەمەبەستی گفتوگۆكردن لەسەر یاسای "چاودێری و پەرەپێدانی بەرهەمی ناوخۆیی عێراقی"، شاندێكی لقی هەولێری یەكێتی هاوردە و ناردنكارانی هەرێمی كوردستان سەردانی پەرلەمانی هەرێمی کوردستانی كرد و لیژنەی دارایی و کارووباری ئابووری کۆبوەوە.

شیركۆ جەودەت، ئەندامی لیژنەی دارایی و کارووباری ئابووری لە پەرلەمانی هەرێمی كوردستان، لە كۆنگرەیەكی ڕۆژنامەنووسیدا ڕایگەیاند، ئەمڕۆ لەگەڵ نوێنەرانی ژووری بازرگانی وئەو سەندیكا و یەكێتیانەی كە نوێنەرایەتی كارگە و بەرهەمە خۆماڵییەكان دەكەن كۆبووینەوە، بۆ ئەوەی یاسای پاراستنی بەرهەمە خۆماڵیەكان تێروتەسەل بكەین لەگەڵ ئەوان، چونكە ئەوان لەواقعی كێشەكانی خۆیان دەزانن.

وتیشی: چەند خاڵێكی مەترسیدارمان ئاشكراكردووە كە ڕێگرن لەبەردەمی پاراستنی بەرهەمی خۆماڵی كە هەندێكیان پەیوەندییان بەعێراقەوە هەیە و بەشێكیش پەیوەندیان بە یاساكانی تایبەت بە پاراستنی بەرهەمە خۆماڵییەكان هەیە، ئەوەشیخستەڕوو کە لەهەرێم هێز هەیە لەڕێگای كۆمپانیاوە بەناوی وەزارەتەوە بەشێوەی نایاسایی ٤۰۰ دۆلار لە بارهەڵگرەكان وەردەگرن، لەخاڵە سنورییەكان كە هیچ پەیوەندییەكیان نیە بەحكومەتەوە.

ئاماژەی بۆئەوەشكرد، بەداخەوە لەهەرێمی كوردستان سەروەری یاسا لەبەردەم پرسیاری گەورەدایە، تەنها لە ۳۰٪ یاساكانی پەرلەمانی هەرێمی كوردستان جێبەجێ دەكرێت، چونكە هێزو كۆمپانیا و دەزگای دەست ڕۆیشتوو هەیە ڕێگا نادات یاساكان جێبەجێ بكرێن.

لای خۆشیەوە گیلان حاجی سەعید، سەرۆكی لقی هەولێری یەكێتی هاوردە و ناردنكارانی هەرێمی كوردستان ڕایگەیاند، گفتوگۆمان كرد لەسەر یاسای ژمارە ۱۱ی ساڵی ۲۰۱۰ی پاراستن و پشتیوانی بەرهەمی ناوخۆ، ئەمانە پرسی گرنگن چونكە كێشەكان ڕووبەڕووی ئێمە دەبێتەوە، ئێمەش گیروگرفتەكانی خۆمان خستەڕوو و ڕەخنەكانی خۆشمان لەسەر یاساكە خستەڕوو.

ک.س