هەشتەم گروپی هەدەپە لە باشوور دەستیان بە مانگرتن کرد

هەشتەم گروپی نوێنەرایەتیی هەدەپە لە باشوری كوردستان مانگرتنیان دەستپێكرد و دووپاتیدەکەنەوە، بەردەوامدەبن لە مانگرتن تا گۆشەگیریی سەر عەبدوڵا ئۆجالان ڕێبەری پەكەكە هەڵدەگیردرێت، هاوکات چاوەڕێی پشتیوانیی زیاتر لە باشور دەکەن.


لە ٢١ی ئەم مانگەوە، ئەندامانی نوێنەرایەتیی پارتی دیموكراتی گەلان-هەدەپە لە باشوری كوردستان، کە ناوەندی سەرەکییان لە شاری هەولێرە، دژی بەردەوامیی گۆشەگیریی سەر عەبدوڵا ئۆجالان ڕێبەری پارتی كرێكارانی كوردستان و بۆ پشتگیریی لە مانگرتنی لەیلا گوڤەن هاوسەرۆكی كەجەدە لە زیندانیی ئامەد، دەستیان بە مانگرتنی خولیی كردووە، ئەمڕۆش هەشتەم  گروپ مانگرتنیان دەستپێكرد.

عابد ئیكە، هاوسەرۆکی نوێنەرایەتی هەدەپە لە باشوری كوردستان ڕایگەیاند:"هەتا گۆشەگیریی لەسەر ڕێبەر ئاپۆ بەردەوام بێت و پەرلەمانتارەكان لە زیندانەكانی دەوڵەتی تورك بمێننەوە، چالاکیی مانگرتنی ئێمەش بەردەوام دەبێت".

لەگەڵ دەستپێکردنی مانگرتنەکەی هەدەپە لە شاری هەولێر، بەردەوام پارت و گروپ و چالاکوانان سەردانی مانگرتووەکان دەکەن و پاڵپشتی خۆیان دووپاتدەکەنەوە، عابد ئیکە داوا لە تەواوی چین و توێژەكانی باشووری كوردستان دەکات، كە پاڵپشتییەكەیان تەنها لە چوارچێوەی سەردان-دا نەبێت، دەشڵێت:"پێویستە ئەوانیش لەگەڵ ئێمە دەست بە مانگرتن بكەن، چونكە ئەمڕۆ لە باكوری كوردستان دژایەتیی كورد دەكرێت، سبەینێ دژایەتییەكە لە باشور و لەداهاتوودا لە هەر چوار پارچەی كوردستان دەبێت".

ماوەی ١٥ ڕۆژە ئەندامانی هەدەپە لە باشووری كوردستان، لە چوارچێوەی هەشت گروپدا بەشدارییان لە مانگرتنە خولییەكەدا كردووە، ڕۆژانەش پارت و لایەنە سیاسییەكان، وەك پشتگیرییەك، سەردانی نوێنەرایەتییەكەی هەدەپە دەكەن.

ش.ف