هەولێر، خوێندكارانی زانكۆ و پەیمانگاكان دووبارە گردبوونەوە

خوێندكارانی زانكۆ و پەمانگاكانی هەولێر، دووبارە داوای پێدانی دەرماڵە و باشتركردنی ڕەوشی بەشە ناوخۆییەكان دەكەن.


ئەمڕۆ نوێنەرانی خوێندكارانی زانكۆ و پەیمانگاكانی هەولێر، بەمەبەستی ناڕەزایی دەربڕین بەرامبەر كێشەكانیان و پێنەدانی دەرماڵە، گردبوونەوەیەكیان لە بەردەم وەزارەتی خوێندنی باڵا و توێژینەوەی زانستیی هەرێم ئەنجامدا، لە ڕێگەی یاداشتێكەوە داواکارییەکانیان ڕادەستی وەزارەتی خوێندنی باڵا کرد.

لە یاداشتەكەیاندا، خوێندكاران ڕایانگەیاندووە:"هەفتەی ڕابردوو، لەبەردەم وەزارەتی خوێندنی باڵا گردبوونەوەیەكی ناڕەزاییمان ئەنجامدا بەمەبەستی چارەسەركردنی كێشە و گیروگرفتەكانی فێرخوازان، دوای پێدانی مۆڵەتی یەك هەفتە بە لایەنی پەیوەندیدار، بەڵام تا ئێستا وەڵامیان نەداوینەتەوە و داواكارییەكانمان پشتگوێخراوە، بۆیە دووبارە  بەنوێنەرایەتی سەرجەم فێرخوازان گردبوونەوەیەكی تری ناڕەزای ئەنجامدەدەین".

خوێندكارانی ناڕازی دووبارە كۆمەڵێك داواكارییان داوە بە وەزاەرتی خوێندنی باڵا، لەوانە:

1-داواكارین بەزووترین كات دەست بكرێتەوە بە دابەشكردنی دەرماڵەی فێرخوازانی زانكۆ و پەیمانگاكان، كە ماوەی چوار ساڵە بڕدراوە و ئێستا هیچ بیانویەك نابینین لە دابەشنەكردنی ئەم بڕە پارەیە هەرچەند بڕێكی كەمیشە.

2 -چارەسەركردنی گیروگرفتەكانی فێرخوازانی بەشە ناوخۆییەكان، كە بەڕاستی فێرخوازان لە بەشە ناوخۆییەكان لە چەندین گیروگرفتی جۆراوجۆردان.

3-خەرجكردنی پارەی فێرخوازانی پاڕالێل(لەو سیستمەدا خوێندکار بە پارە دەخوێنێت) بۆ خزمەتی زانكۆ و پەیمانگاكان.

4-ڕێخستنەوەی سیستمی زانكۆكان بەشێوەیەكی دروست، بێ ئەوەی زیان بە فێرخواز بگەیەنێت.

-5گرنگیدان بە دەرچووانی زانكۆ و دامەزراندنیان لە كەرتەكانی تایبەت و گشتی.

6 -نەمانی باج و ڕسومات لە زانكۆ و پەیمانگاكان.

7 -ئاوەدانكردنەوەی ناوەندەكانی زانكۆ و پەیمانگاكان و گرنگیدان پێیان.

8 -جیاوازینەكردن لەڕووی خزمەتكردن و لەڕووی ئیدارییەوە.

9 -دانانی نوێنەری فێرخوازان لەلایەن خۆیانەوە و بە ڕێگەی هەڵبژاردن.

ش.ف