هەولێر، دووەم كۆڕبەندی سەكۆی چاكسازی بەڕێوەچوو

بەمەبەستی بەشداری گشتی لە پرۆسەی چاكسازی و هاوبەشی لایەنە پەیوەندیدارەكان لە پرسەكەدا دووەم كۆربەندی سەكۆی بەشداری گشتی لەچاكسازی لە هەولێر بەڕێوەچوو، پەرلەمانتارێکیش ئاشکرایدەکات کە بەرپرسی ئەمنی هەیە لە هەرێم، ٨٠ موچەی بندیوارەكانی وەردەگرێت و دەوامیان پێناكات.


ئەمڕۆ لە هوتێل چوارچرای  شاری هەولێر دووەم كۆڕبەندی سەكۆی بەشداری گشتی چاكسازی لە هەرێمی كوردستان بەڕێوەچوو کە ئینستیتیوتی ڕیفۆرم بۆ گەشەپێدان ڕێکیخستبوو تێیدا ژمارەیەك توێژینەوەی تایبەت بە چاكسازی خرایەڕوو.

دانا سەعید سۆفی، سەرۆكی ئینستیتیوتی ڕیفۆرم بۆ گەشەپێدان، لەبارەی ئامانجی کۆڕبەندەکە لە كۆنگرەیەكی ڕۆژنامەنووسیدا ڕاگەیاند: دەبێ پێگەی هاوڵاتیان لە پرۆسەی چاكسازیدا بوونی هەبێ.

وتیشی: پێویستە هەمووان لایەنی چاكسازی بەجددی وەرگرین نەك تەنها بۆ میدیابێت، دەبێ بەرنامەی كارهەبێت و هەمووان كاری لەسەر بكەن، چونكە پێمانوایە دەمانەوێ شێوازی حوكمرانی بگۆڕین و دەبێ پێمانوابێ تا ئێرە بە هەڵە ڕۆیشتووە.

 لە كۆڕبەندەكەدا پانێلێک كە بەناونیشانی (چاكسازی بەرەو كوێ؟ زەمینە  و بەربەرستەكانی) كە بۆ هەریەكە لە (عەلی حەمە ساڵح، ئەندامی پەرلەمانی هەرێمی كوردستان، دكتۆر محەمەد ڕێكانی، ئەندامی داواكاری گشتی و تانیا جەمال غەریب، ئەندامی پەیەمانگای ناوین و نوێنەری وەزارەتی كارو باری كۆمەڵایەتی) ڕێکخرا، لەوتەكانیدا عەلی حەمە لە پانێڵەکەدا ئاشکرایکرد كە ٤٨٪ی هەموو بودجەی بەكارخستن كە موچە دەگرێتەوە بۆ وەزارەتەكانی پێشمەرگە و ناوخۆ دەڕوات، بەڵام لە هەرێمی كوردستان ١٢٠ كۆمپانیای ئەمنی هەیە، کە بەشێوەیەك كاردەكەن گەنجی بێكاریان بەكرێگرتووە بە پارەیەكی كەم و خۆشیان زیادەكەی وەردەگرن و بەوشێوەیە داهاتی مانگانەیان نزیكەی یەك ملیۆن دۆلارە، وتیشی: ڕوون و ئاشكرایە كە ئەو كۆمپانیایانە هی بەرپرسەكانی هەرێمی كوردستانن.

باسی لەوەشكرد كە ئێستا دەیان دۆسیەی گەندەڵی و بندیوار لە وەزارەتەكانی ناوخۆ و پێشمەرگە لە بەردەستدان و بەرپرسی ئەمنی هەیە ٨٠ موچەی بندیوارەكانی وەردەگرێت و دەوامیان پێناكات، بۆیە پێویستە دەست بۆ دۆسیەی چاكسازی ببەین و لە شتە بچووكەكانەوە دەست پێ بكەین ئینجا بگەینە خاڵی دەستبردن بۆ دۆسیەی نەوت.

ک.س