هەولێر، شاندێک لە کەنەکە، حزبەکان و ڕۆژنامەنووسان سەردانی هەدەپەیان کرد

وەک پشتیوانییەک بۆ هەدەپە دژ بە داگیرکردنی شارەوانییەکانی باکوری کوردستان و ڕەشبگیریی کوردان و ئەندامانی هەدەپە، كۆنگرەی نەتەوەیی کوردستان- کەنەکە و نوێنەری حزب و لایەنە سیاسییەكان و نووسەران و ڕۆژنامەنووسان و كەسایەتییەكان، سەردانی نوێنەرایەتی هەدەپە-یان لە شاری هەولێر کرد.


بە دەستپێشخەری کەنەکە، گروپێک لە بنەماڵەی شەهیدان، نوێنەری لایەنە سیاسییەکان و ڕێکخراوەکان و ڕۆژنامەنووسان، ئەمڕۆ سەردانی نوێنەرایەتی باشوری کوردستانی هەدەپەیان لە شاری هەولێر کرد، دوای دانیشتن و وتوێژ دەربارەی دوۆخی ئەمڕۆی کوردستان، لە کۆنگرەیەکی ڕۆژنامەنووسیدا مەبەستی سەردانی شاندەکە ڕوون کرایەوە.

لە کۆنگرەیەکی ڕۆژنامەنووسیدا فریاد هیرانی بەیاننامەی کەنەکەی خوێندەوە و تێیدا هاتبوو: ئەم كردەوە دڕندانەیە وەڵامی دوا پەیام و دەستپَیشخەری ئاشتیخوازانەی بەڕێز عەبدوڵا ئۆجالانە، كە ئامادەیی خۆی نیشاندابوو بۆ ئاشتیی، ئەردۆغان و دەسەڵاتەكەی بۆ پەردەپۆشكردن و شاردنەوەی شكستە یەك لە دوای یەكەكانی لە باكوری سوریا و رۆژئاوای كوردستان و باشووی كوردستان پەلاماری نوێنەران و سەرۆك شارەوانییە هەڵبژێردراوەكان و چالاكوانانی باكوری كوردستان دەدات، تۆڵەی شكستە سەربازییەكانی لە باكوری سوریا بە پەلاماری ژن و پیر و منداڵانی گوندەكانی بناری قەندیل و بادینان دەکاتەوە.

هەروەها هاتبوو: ئەردۆغان تووشی هیستریا بووە بە بیستنی ناوی كورد و كوردستان، دەیەوێت شتێك لە سوریا و باكوری سوریا و ڕۆژئاوا نەمێنێت بە ناوی كورد، دەیەوێت شتێك لە باشوری كوردستان نەمێنێت بە ناوی كورد و حكومەتی هەرَیم و پەرلەمانی هەرێم و ئێستاش باشوری كوردستان بە باكوری عێراق ناوزەد دەكا، لە كاتی ریفراندۆمەكەی باشوری كوردستان هەموو سوكایەتییەكی  بە حكومەتی هەرێم و حزبەكانی باشور و سەركردەكانی باشور كرد، لە باكوری كوردستانیش ئَیستاش هەر بە عەقلیەتی توركی چیایی مامەڵە دەكات.

لە پەیامەکەدا ئاماژە بەشکستەکانی ئاکەپە و ئەردۆغان لە ناوخۆ و دەرەوەی تورکیا کراوە، هەروەها بەرامبەر هێرشەکانی دەوڵەتی تورک بۆ سەر کوردستان، لەپەیامەکەدا هاتووە "پێویستە كورد بەگیانی یەکێتی نەتەوەیی لە هەموو كوردستان یەكگرتووانە ڕووبەڕووی هێرش و پەلامارە دڕندەكانی ئەردۆغان بێتەوە، هەروەها دژی داگیرکردنی شارەوانییەکانی باکور پێوییستە هەموو حزب و لایەنەكانی باشوری كوردستان و هەموو كوردێكی دڵسۆز و ئازادیخواز ڕووبەڕووی ئەو داگیركاری و هێرشانەبێتەوە".

هەرلەو کۆنگرەدا، موزەیەن گیونەش، هاوسەرۆكی هەدەپە لە باشوری كوردستان، قسەیکرد و وتی: ئەمڕۆ هێرش و پەلاماردان لەسەر گەلی كورد هەبێت لە باكوری كوردستان، لە داهاتوودا تەواوی پارچەكانی كوردستان دەگرێتەوە، بۆ نمونە نزیكەی مانگێكە گەمارۆ خراوەتە سەر كامپی مەخمور، چەندان دایك كۆرپەكەی لەدەستداوە، بە تەنها لەبەرئەوەی ڕێگا بە هیچ كەس نادرێت بێنە شاری هەولێر.

هاوسەرۆکی هەدەپە دڵخۆشی خۆیانی دەربڕی لە بەرامبەر سەردانی توێژەجیاوازەکان و پشتیوانییەکانیان بۆ هەدەپە.

س.ح