هەولێر، هاوڵاتییەک ٤٨ ملیۆن دینار پارەی ئاوی بۆ هاتوەتەوە

گەڕانەوەی پارەیەکی زۆر بۆ ماڵان، سیستەمی نوێی خوێندنەوەی ئاوی ماڵانی ڕووبەڕووی چەندین گرفتکردوەتەوە، بە جۆرێک ژمارەیەک ماڵ لە پارێزگای هەولێر، دەیان ملیۆن دینارییان وەک کرێی بەکارهێنانی ئاو بۆ هاتووەتەوە، بەڕێوەبەری گشتی ئاوی هەرێمیش دەڵێت: هەڵە لەكارمەندی خوێندنەوەی پێوەرەكانەوە ڕوویداوە و ڕەنگە ٤٨ هەزار دیناری کردبێت بە ٤٨ ملیۆن دینار و بەدواداچوون بۆ ئەو پرسە دەكەین.


دانانی پێوەری زیرەک و جێبەجێکردنی سیستەمی نوێی خوێندنەوەی ئاوی ماڵان لە سنوری پارێزگای هەولێر ڕووبەڕووی چەندین گرفتبوەتەوە و گەڕانەوەی پارەیەکی زۆر بۆ ماڵان، هاوڵاتیانی نیگەران کردووە، بەپێی بەدواداچونێكی ڕۆژنیوز، لەناو شاری هەولێر هەریەكە لە گەڕەكانی هەولێری نوێ، فەرمانبەران، ٩٤ باداوان و شارەدێی دارتوو، ٥ی حسارۆكان، بەهاری نوێ و ٩٩ی زانكۆ، لەڕێگەی پسوڵەی مانگانەی ئاوەوە پارەیەکی زۆریان بۆ هاتوەتەوە.

سەعید عەبدولڵا، دانیشتووی هەولێرە و هاوشێوەی بەشێكی تر لە گەڕەکەكانی شارەکەی پارەیەکی زۆری بەکارهێنانی ئاوی بۆهاتوەتەوە و دەڵێت: ئەو پێوەرەی بۆ ئاوی ماڵان دانراوە پارەیەكی زۆر بۆ هاوڵاتیان دێنێتەوە، ئەوەش دوو بۆچوونمان لا دروست دەكات، یەكەم ئەوەیە كە حكومەت دەیەوێ بەهەر بیانوویەك بووە گیرفانی هاوڵاتیانی كوردستان دابدۆشێت، دووەم ئەوەیە كۆمپانیاكانی كۆكردنەوەی پارەی ئاوی ماڵان كە گرێبەستیان لەگەڵ حكومەت كردووە، بە هەر شێوازێک بووە قازانج بكەن ئەوەش بە هەردوو لادا هاوڵاتیان زیانیان بەردەكەوێ.

هەروەها ڕێباز ئەحمەد، دانیشتووی شارەدێی دارتوو لە هەولێر، دەڵێت: ئێمە لە خانووی كرێداین بڕێكی زۆر پارە دەدەینە کرێی خانووەكەمان، هەروەها لە هەمانكاتدا مانگانە كرێی كارەبای مۆلیدە و كارەبای نیشتمانی و ئێستا كرێی ئاویشی هاتۆتە سەر دەدەین، كە بە ڕێژەیەكی زۆر پارەی ئاو دێتەوە ئەمەش وایكردوە ژیانمان بە ئەستەم بەڕێوەبچێت.

وتیشی: ئەو موچەیەی كە مانگانە وەریدەگرین ڕاستەوخۆ دەبێت بیدەینە ئەو باجانەی كە حكومەت بەسەر ئێمەیدا سەپاندوە ئەگەر سەیری ئەو پێوەرە بكەین كارێکی باشە بۆ ئەوەی خەڵکی ئاوی زیاد لە پێویست بەکارنەهێنن، بەڵام نەک وەک ئەو سیستەمە سەقەتەی ئێستا هەیە، كە لەگەڵ هەوای ئاوەكەشدا پێوەرەكەی دەجوڵێت و پارە ئەژمار دەکات.

ئەو هاوڵاتیە ئاماژەی بۆ ئەوەشکرد کە "ئێمە لە گەڕەكەكەی خۆمان دراوسێمان هەیە ١٠٠ تاوەكو ١٢٠ هەزاری بۆ هاتووەتەوە ئەگەر من وەكو هاوڵاتیەك بە تانكەر ئاو بكڕم ئەو بڕە پارەیە خەرج ناكەم كە حكومەت لێم وەردەگرێت".

لەبارەی گەڕانەوەی ئەو ڕێژە زۆرەی پسوڵەی پارەی ئاوی ماڵان، مەسعود كاڕەش، بەڕێوەبەری گشتی ئاو و ئاوەڕۆكانی هەرێمی كوردستان، بە ڕۆژنیوزی ڕاگەیاند، لە سەرانسەری كوردستان نزیكەی هەزار دۆسیەی لەو شێوەیەمان هەیە كە هاوڵاتیان پارەیەكی زۆریان لە خەرجی ئاو بۆ هاتۆتەوە، بەڵام ئێمە لە ڕێگەی ئەم كەناڵەی ئێوە و هەموو دەزگاكانی دیكەوە داوا لەو هاوڵاتیانە دەكەین سەردانی فەرمانگەكانی ئاوی ناوچەكەی خۆیان بكەن، چونكە ڕامان سپاردوون بەداواچوون بۆ ئەو دۆسیانە بكەن، چونكە ئێمەش بێگومانین كە هەڵەیەك ڕوویداوە، چونكە هەندێك هاوڵاتی نزیكەی ٤٨ ملیۆن دیناریان بۆ هاتۆتەوە، بەڵام پێمانوایە ئەوە ڕەنگە ٤٨ هەزار دیناربێت و هەڵە لە كارمەندی خوێندنەوەی پێوەرەكانەوە ڕوویداوە.

بەڕێوەبەری گشتی ئاو و ئاوەڕۆكان زیاتر دواو وتی: تا ئێستاش لە كوردستان ژمارەیەكی زۆری هاوڵاتیان پێوەری ئاویان نەبەستووە كە ئێمەش بۆ مانگی یەكەم ١٠٠ هەزار و مانگی دووەم ٢٠٠ هەزاردینارمان داناوە، كە سزای بەسەردا بسەپێنین، هەرچی ئەو هەڵەیەشی كە كراوە ئەوە بابەتێكە دەكرێ چارەسەر بكرێ، چونكە ئێمە لە سەرانسەری كوردستان نزیكەی ٨٠٠ هەزار بەشداربووی ئاومان هەیە دەكرێ لەو ژمارەیە نزیكەی هەزار دۆسیە هەڵەی تێدابكرێت لە خوێندنەوە و نووسینی پێوەرەكانی ئاو.

ک.س