هەپەگە ڕایگەیاند، لە چالاکییەکانی گەریلاکاندا لە ناوچەی زاپی باشووری کوردستان ١٥ سەربازی تورک کوژران و گورز لە فڕۆکەی بێ فڕۆکەوانیش دراوە، هاوکات سیستمێکی کامێرای چاودێرییش تێکشکێندراوە.
ناوەندی راگەیاندن و چاپەمەنی هێزەکانی پاراستنی گەل -هەپەگە لەبارەی چالاکی گەریلا و هێرشی داگیرکەری نوێترین ڕاگەیەندراوی خۆی بڵاو کردەوە و تیادا ئەنجامی چەند چالاکیەکی لە هەریمی زاپ ئاشکرا کرد.
هەپەگە لە ڕاگەیەندراوەکەدا دەڵێت: بەرخۆدانی بێوێنە و چالاکیە بەهێزەکانی گەریلای ئازادی کوردستان بێوەستان بەردەوامە. لەگەڵ ئەوەی سوپای داگیرکەری تورک ٣٨ جار بە چەکی کیمیایی، ٥٦ جار بە فڕۆکەی شەڕ و بە سەدان جار تۆپ و هاوەن هەرێمەکانی بەرخۆدانی بۆردومان و تۆپباران کردووە، هیچ ئەنجامێکی بەدەستنەهێناوە.
ئاشکراشیکردووە لە چالاکیەکاندا کە رۆژانی ١٨ و ٢٠ و ٢١ی مانگ بە پێشەنگایەتی هێزەکانی یەژاستار ئەنجامدراون، ١٥ داگیرکەر سزادران، ٣ داگیرکەر بریندار بوون، سیستمێکی کامێرای حەراری تێکشکێنرا و گورز لە دوو درۆن وەشێنران.
ڕوونیکردووەتەوە، نیوەڕۆی رۆژی ٢١ی ئایار سەنگەرەکانی شەڕی شەهید تۆڵهەڵدانی کورەژارۆ لەلایەن سوپای داگیرکەری تورکەوە ٧ جار بە چەکی کیمیایی و تەقەمەنی بۆردومانکران. دوای بۆردومانەکە کاتژمێر ١٥:٣٠ گروپێک داگیرکەر بە جلی دژی کیمیایی ویستیان بەرەو سەنگەرەکانی شەڕ پێشڕەوی بکەن. داگیرکەران بە تاکتیکی سابۆتاژ لەلایەن هێزەکانمانەوە کرانە ئامانج. داگیرکەران کشانەوە و دوای ماوەیەک دەستیان بە پێشڕەوی کردەوە و ئەمجارە بە بۆمب و چەکی سووک لێیاندرا. هەمان رۆژی کاتژمێر ١٧:٢٥ داگیرکەران جارێکی دیکە لەلایەن هێزەکانمانەوە کرانە ئامانج و لێیاندرا.
ئەوەشی وتووە: ٢١ی ئایار لە بارەگاکانی سەر سنورەوە، گردی رووبار، گردی جوودی، گردی شەهید کەنداڵ، گردی شەهید یونس، گردی شەهید لەشکەر، کورەژارۆ، شەهید شەمدین، مامڕەش، چیارەش، شەهید دونیا، چەمچۆ و ڕەنجبەر ئاغای هەرێمی زاپ، بە تۆپبارانکران و فڕۆکە جەنگیەکانیش ٣٦ جار هێرشیان کرد.
ئاماژەی بەوەشکرد:٢١ی ئایار گۆڕەپانی گردی هەکاری، گردی چارچەل، گردی ئۆرتێی هەرێمی مەتینا لە بارەگاکانی سەر سنورەوە بە ئۆبۆس تۆپبارانکران و ١٣ جاریش لە لایەن فڕۆکە جەنگیەکانەوە بۆردومانکران. هەمان ڕۆژ بنارەی گۆڕەپانی بەرخۆدانی وەرخەلێی هەرێمی ئاڤاشین بە ئۆبۆس لەلایەن بارەگاکانی سەر سنورەوە تۆپبارانکرا و ٧ جاریش فڕۆکە جەنگیەکان هێرشیان ئەنجامدا.
ها-غ