هەپەگە ڕایگەیاند، لە چالاکیی گەریلاکاندا لە ناوچەکانی زاپ و ئاڤاشین، سێ سەربازی تورک کوژراون و سەنگەرێکیش تێکشکێندراوە.
ئەمڕۆ ناوەندی ڕاگەیاندن و چاپەمەنیی هێزەکانی پاراستنی گەل-هەپەگە ڕاگەیەندراوێکی لەبارەی چالاکیی گەریلاکانەوە بڵاوکردەوە و تێیدا ڕایگەیاند: چالاکیی هێزەکانمان لە زاپ و ئاڤاشین بەردەوامە دژی داگیرکەران، کە چەکی کیمیایی و هەموو جۆرە تەقەمەنییەک بەکاردەهێنن.
بەگوێرەی ڕاگەیەندراوەکەی هەپەگە، دوێنێ گەریلاکانی یەژاستار سێ چالاکییان لە ناوچەی وەرخەلێی ئاڤاشین دژی سوپای تورک ئەنجامداوە، کە چالاکییەکیان لەڕێگەی تەقاندنەوە و دوو چالاکییەکەی دیکەش بە چەکی قورس ئەنجامدراون و دواتریش سوپای تورک پێنج جار ناوچەکەی بۆردوومان کردووە.
هەر بەپێی ڕاگەیەندراوەکە، گەریلاکان لە ڕۆژانی ١١ و ١٢ی ئایار زنجیرەیەک چالاکییان لە ناوچە جیاجیاکانی زاپ دژی سوپای تورک ئەنجامداوە و لە ئەنجامدا سێ داگیرکەر سزادراون و سەنگەرێکیش تێکشکێندراوە.
هەپەگە ئەوەشی خستووەتەڕوو، کە شەوی ١٢ی ئایار سوپای تورک بە چەکی کیمیایی و تەقەمەنیی گردی شەهید بەرخۆدانی لە زاپ بۆردوومان کردووە.
هەپەگە ڕاشیگەیاندووە، کە سوپای تورک لە دوو ڕۆژی ڕابردوودا ١٤ جار سنووری زاپ و مەتینا و خواکورکی بە فڕۆکە و هێلیکۆپتەری جەنگیی و تۆپ و هاوەن بۆردوومان و تۆپباران کردووە.
ب.ل
