دەربارەی سیاسەتی شەڕخوازانەی پەدەکە و هەوڵەکانی بۆ هەڵگیرساندنی شەڕ، هەڤاڵ كوێستانی، ڕایگەیاند، لە کاتی چوونی بۆ دەڤەری سۆران بە چاوی خۆی بینیویەتی کۆمەڵێک چەکدار سەرقاڵی نوێکردنەوەی كۆنە ڕەبایەیی سەردەمی شەڕی ناوخۆبوون، ئەوەش بە زەنگێکی مەترسیدار دەزانێت و پێیوایە شەڕ قازانجی تەنها بۆ تورکیا دەبێت.
هەڤاڵ كوێستانی، نووسەر و سیاسەتمەداری كورد، لەبارەی ئەو ئاڵۆزییانەی دروستبوون لە باشوری كوردستان و جوڵاندنی هێز لەلایەن پارتی دیموكراتی كوردستان – پەدەکەوە بۆ ناوچەکانی گەریلا، لێدوانی بۆ ڕۆژنیوز-دا.
لە سەرەتای لێدوانەکەیدا باسی لەوە كرد كە شەڕی ناوخۆ ماڵوێرانییەكی گەورە بۆ كورد دەهێنێت و وتی:”ئەگەر ئەم شەڕەی كە ئێستا دەهۆڵی بۆ لێ دەدرێت ڕووبدات، ڕاستەوخۆ دەكەوێتە قازانجی توركیا و ئیران و ماڵوێرانیەكەش تەنیا بۆ كورد دەمێنێتەوە.”
ئاماژەی بەوەشكرد، كە لە کاتی چوونی بۆ دەڤەری سۆران بە چاوی خۆی بینیویەتی کۆمەڵێک چەکدار سەرقاڵی نوێکردنەوەی كۆنە ڕەبایەی (سەنگەر) سەردەمی شەڕی ناوخۆبوون، بۆئەوەی چەكداری لێ جێگیر بکرێت.
کوێستانی، زیاتر لەسەر ئەو مەترسییە دوا و وتی: جێگیركردنی چەکدار لەو ڕەبایانەدا دواتر زیانی گەورەی بۆ كورد دەبێت، چونكە ڕەنگە لە داهاتوو هێزی دەوڵەتانی داگیركەری لێ جێگیربكرێت، یان شەڕی كورد بەكوردی لێبکەویتەوە، کە ئەو شەڕەش دەكەوێتە خزمەتی هێزە داگیركەرەكان.
دەربارەی چارەسەری ئەم دۆخە و بانگەوازی پەكەكە بۆ چارەسەریی و یەكگرتنی هێزەکان، هەڤاڵ كوێستانی، وتی: ئەم جۆرە بانگەوازییانە شتێكی باشن وگرنگە، چونكە هەمیشە چارەسەریی گرنگترە لە شەڕكردن و وێرانكردنی یەكتری.
لەکۆتایی لێدوانەکەشیدا وتی: بەداخەوە بەهۆی هەست نەكردن بە بەرپرسیارێتیی و نەبوونی هەستی نەتەوەیی و زاڵبوونی كاریگەریی توركیا و دەستخستنە ناو ئەم ئاڵۆزییانە، ڕەنگە نەتوانرێت بەلای چارەسەریی پێویستدا بچن، چونكە چارەسەریی، گفتوگۆ و كۆبوونەوە لە قازانجی توركیا نین، بەڵكو لەزیانی دوژمنانی كورد و لە سودی هێزە كوردستانییەکانە و ئەمەش هێزە داگیرەكەرەكان نایانەوێت.
ک.س
