هاوڵاتیانی شەنگال بە ئاماژەدان بەوەی کە گۆشەگیریی سەر ڕێبەر ئۆجالان و هێرشە داگیرکەرانەکانی دەوڵەتی تورک بە هیچ شێوەیەک قبوڵکراو نییە، ڕایدەگەیەنن کە تا کۆتایی بەرخۆدان دەکەن.
هاوڵاتیانی شەنگال لەسەر گۆشەگیریی سەر عەبدوڵا ئۆجالان ڕێبەری گەلی کورد و داگیرکارییەکانی دەوڵەتی تورک، بۆ ئاژانسەکەمان دەدوێن.
هاوڵاتییەک بەناوی قاسم دەدێدا، دەڵیت: دەوڵەتی تورک و هەموو هێزە سەردەستەکان، بە هەموو هێزیانەوە هێرش دەکەنە سەر بزوتنەوەی ئازادیخوازیی کوردستان، ئامانج لەم شەڕە ئەوەیە کە دیموکراسی لەناو بەرن، بۆیە هێرشەکانیان زیادی کردووە و گۆشەگیریی سەر ڕێبەر ئاپۆیان قورستر کردووەتەوە، بۆ ئازادیی ڕێبەر ئاپۆ پێویستە هەمووان تێبکۆشن، دەوڵەتی تورک بەو هێرشانە دەیەوێت عوسمانیی نوێ پێکبێنێت، کە خەونی ئەردۆغانە، ئێمەش دەڵێین؛ “ئەو خەونە لە خەیاڵیدا دەمێنێتەوە و پێکنایەت”.
هاوڵاتییەکی دیکە بەناوی موراد سمۆقی، دەڵێت: کۆمەڵگای ئێزدی دژی هێرشەکانی دەوڵەتی تورک بۆسەر هەرێمەکانی پاراستنی مەدیایە، لە هەر شوێنێک هێرش بکرێتە سەر خاکی کوردستان، ئێمە دژی دەوەستینەوە، ئێمە هێرش ناکەینە سەر کەس، بەڵام مافی ژیان کردنمان لەسەر خاکی خۆشمان هەیە، بۆیەش تا کۆتایی بەرخۆدان دەکەین، گۆشەگیریی سەر ڕێبەر ئاپۆش قبوڵکراو نییە، داوا لە نەتەوە یەکگرتووەکان دەکەین کە کۆتایی بە گۆشەگیریی بێنن.
ب.ک
