وتەبێژی یەکێتی: ڕۆژی هەینی لەگەڵ پارتی کۆدەبینەوە 

وتەبێژی یەکێتی ڕایدەگەیەنێت، بۆ تاووتویکردنی دواین ڕەشنوسی پرۆژە سیاسییەکەی نێوانمان ڕۆژی هەینی لە سلێمانی لەگەڵ پارتی کۆدەبینەوە. 


بەهۆی ناکۆکییەکانی نێوان یەکێتی و پارتییەوە، نزیکەی پێنج مانگە هەڵبژاردن کراوە و هێشتا حکومەتی نوێی هەرێمی کوردستان پێکنەهێنراوە، ئەگەرچی تا ئێستا چەندین کۆبوونەوەیان ئەنجام داوە، بەڵام نەگەیشتوون بە هیچ ئەنجامێک.

لەبارەی کاتی کۆبوونەوەی داهاتووی وەفدی هەردوو مەکتەبی سیاسی یەکێتی نیشتمانی کوردستان و پارتی دیموکراتی کوردستان، سەعدی ئەحمەد پیرە، وتەبێژی یەکێتیی نیشتمانیی کوردستان، ئەمڕۆ بە ماڵپەڕی پیوکەی میدیایی حزبەکەی ڕاگەیاندووە: بڕیارە ڕۆژی هەینی هەردوو مەکتەبی سیاسی یەکێتی و پارتی لە مەکتەبی سیاسی یەکێتی لە سلێمانی کۆببنەوە.

لە بارەی ئامانجی کۆبونەوەکەشیان وتەبێژەکەی یەکێتی وتویەتی: ئامانج لە کۆبوونەوەکە گفتوگۆکردنە لەسەر پرۆژەی سیاسی نێوانیان و ڕەشنوسی کۆتایی پرۆژەکە.

ئەوەش لە کاتێکدایە دوای کۆبونەوەکەی ئەمڕۆیان مەکتەبی سیاسی یەکێتی لە ڕاگەیەنراوێکدا ئاماژەی بۆ ئەوەکرد، کە کۆبوونەوەی ١٨ی ئەم مانگەی پەرلەمانی هەرێم پەیوەستە بە ڕێککەوتنیان لەگەڵ پارتی.


ک.ک