چوؤرشەممە, 27 يون 2018 – 11:17 ڕۆژنیوز – ناوەندی هەواڵەکان
پشتگیرییەکان بۆ ڕامین حسێن پەناهی، زیندانیی سیاسی کوردی سزادراو بە سێدارە بەردەوامە، لەو چوارچێوەیەدا نامەیەک بە ١٠ هەزار واژۆوە ئاراستەی ڕێکخراوە نێودەوڵەتییەکان کرا.
لەو نامەیەدا کە دوێنێ لە میدیاکانی ئێراندا بڵاوکرایەوە، ڕاگەیەندراوە، کە لەکاتێکدا سزای سێدارە بەسەر ڕامین حسێن پەناهیدا سەپێندراوە، کە ناوبراو دانی بە هیچ کامە لەو تۆمەتانەدا نەناوە، کە خستوویانەتە پاڵی.
هەورەها هاتووە: پارێزەری ئەو زیندانییە سزاکەی بە سزایەکی چاوەڕواننەکراو و نادادپەراورانە ناوزەدکردووە و ئاشکرایکردووە، کە ئەو سزایە بە فەرمانی سوپای پاسداران و وەزارەتی ئیتلاعات دەرکراوە، چونکە بەپێی یاساکانی ئێران سزای ڕامین حسێن پەناهی نەک سێدارە بەڵکو زیندانیش نییە.
واژۆکەران ڕاشیانگەیاندووە: ئێمە وەک واژۆکەرانی ئەم نامەیە، سزای سێدارەی ڕامین حسێن پەناهی بە سیاسەتێک بۆ تۆقاندنی خەڵکی تێکۆشەری ئێران دەزانین، لەو ڕووەشەوە کە داوای جێبەجێکردنی دادپەروەری و هەڵگرتنی دەستبەجێی سزای سێدارەکەی دەکەین.
ب.ل
