١٤ سەربازی سوپای تورک لە چالاکیی گەریلادا کوژران

گەریلا گورزی قورسی لە سوپای تورک دا، لە ئاڤاشین هەشت و لە سەرحەدیش شەش سەربازی سوپای تورک کوژران.


ناوەندی ڕاگەیاندنی هێزەکانی پاراستنی گەل-هەپەگە، ئەنجامی چەند چالاکییەکی لە باشور و باکوری کوردستان بڵاوکردەوە.

بەگوێرەی ڕاگەیەندراوەکە، گەریلاکانی هەپەگە لە ٢٣/٥/٢٠٩ لە لە نزیک تەپەی خودێ لە هەرێمی ئاڤاشین چالاکییەکی سابوتاژیان ئەنجامدا و بەو هۆیەوە سەربازێکی تورک کوژرا.

هەر بەگوێرەی ڕاگەیەندراوەکە، لە ٢٤/٥/٢٠١٩ لە کاتژمێر ١٠:٣٠ دا گەریلاکانی هەپەگە لە ٣ قۆڵەوە گورزیان لە یەکینەکانی سوپای تورک دا، کە لە گەلیی گاڕانەوە دەچوون بۆ تەپەی خودێ، لەو چالاکییەدا حەوت سەربازی تورک کوژران و دەستیش بەسەر چەکێکی جۆری  MPT-76  دا گیرا. کاتێکیش کۆپتەری سوپای تورک چووەتە ئەو ناوچەیە گەریلاکان گورزیشیان لەو کۆپتەرە داوە.

ئەوەش ڕاگەیاندراوە"هێزە بەشداربووەکانی گەریلا لەو چالاکییەدا بە سەلامەت و بە بێ زیان گەیشتوونەتەوە شوێن و بارەگاکانی خۆیان".

هەروەها، هاتووە:هێزەکانی یەژاستار لە ڕێگای بنکەی سەربازیی شلێ لە بازیایی ئاگری ئۆتۆمبێلێکی زرێپۆشی جۆری کوبرای سوپای تورکیان تەقاندووەتەوە و بەو هۆیەوە شەش سەربازی سوپای تورک کوژران.

ناوەندی راگەیاندنی هەپەگە راشیگەیاندووە، سوپای تورک لە ٢٤ی ئەم مانگە ناوچەکانی ئاڤاشین و زاپ-یان لە هەرێمەکانی پاراستنی مەدیا بۆردومان کردووە، بەڵام لەو بۆردوومان و هێرشانەدا هیچ زیانێک بە هێزەکانی گەریلا نەگەیشتووە.

 

ش.ف