٣ ئاسایش شەهیدبوون و ٤ی دیکەش بریندارن

به‌هۆی هێرشی چه‌ته‌كانی داعش بۆ سه‌ر گوندێكی سنووری شارۆچكه‌ی كفری، بەڕێوەبەر و دوو كارمه‌ندی ئاسایشی بنكه‌ی شاره‌دێی كۆكس شه‌هیدبوون، چوار ئاسایش و سێ هاوڵاتی دیکەش برینداربوون.


دره‌نگانێكی شه‌وی ڕابردوو، له‌گوندی كوڵه‌جۆی سه‌ر به‌ شاره‌دێی كۆكسی سه‌ر به‌ شارۆچكه‌ی كفری لە ئیداره‌ی گه‌رمیان، چه‌ته‌كانی داعش به‌ هاوه‌ن و چه‌كی قه‌ناس هێرشیان كرده‌ سه‌ر گوندێك و ژماره‌یه‌ك قوربانی لێكه‌وته‌وە.

محه‌مه‌د حاجی عومه‌ر، به‌رپرسی كۆمێته‌ی قه‌ره‌ته‌په‌ی یه‌كێتی نیشتیمانی كوردستان، كه‌ باره‌گای كۆمێته‌كه‌ی له‌ناو گوند كوڵه‌جۆیه‌، زانیاریی دایە ڕۆژنیوز، کە چه‌ته‌كانی داعش سێ گوله‌ هاوه‌نیان ئاراسته‌ی ناوه‌ گونده‌كه‌ كردووه و ڕێگه‌ی نێوان هه‌ردوو گوندی كوڵه‌جۆ و قه‌ره‌بڵاغیان بڕیوه‌.

به‌ پێی زانیارییەکانی ڕۆژنیوز، چه‌ته‌كانی داعش سه‌ره‌تا به‌ هاوه‌ن هێرشیان كردوه‌ته‌ سه‌ر گونده‌كه‌ و ئاسایشی شاره‌دێی كۆكس ڕۆیشتونه‌ته‌ هانای خه‌ڵكه‌كه‌وه،‌ دوای گه‌یشتنیان به‌ ناو گونده‌كه‌ به‌ چه‌كی قه‌ناس هێرشكراوه‌ته‌ سه‌ریان و ژماره‌یه‌كیان لێ بریندار كراوه‌، دوای كه‌مێك بۆمبێكی چێنراو به‌ ئۆتۆمبیلی ئاسایشدا ته‌قیوه‌ته‌وه‌ته‌وه‌ ژماره‌یه‌ك ئاسایشی برینداركردووه‌.

هەروەها دواتر چه‌ته‌كانی داعش له‌ سه‌ر به‌رزاییه‌كی نێوان هه‌ردوو گوندیی كوڵه‌جۆ و قه‌ربڵاغی خواروو به‌ناوی كه‌مه‌ر گه‌ڕه‌، به‌ چه‌كی قه‌ناس خۆیان حه‌شارداوه‌ و ڕێگای سه‌ره‌كی نێوان  شارۆچكه‌ی كه‌لارـ شاره‌دێی گوڵاڵه‌یان تا دره‌نگانێكی شه‌و داخستوه‌ و ڕێگای هاتوچۆكردنی ئۆتۆمبیلێان نه‌داوە.

هه‌ڵگورد حه‌مه‌ ئه‌مین، جێگری به‌ڕێوبه‌ری نه‌خۆشخانه‌ی فریاكه‌وتنی شه‌هید هه‌ژار به‌ ڕۆژنیوزی ڕاگه‌یاند، دوو كارمه‌ندی ئاسایش شه‌هیدبوون‌ له‌گه‌ڵ پێنج كارمه‌ندی دیكه‌ و دوومنداڵ و ژنێكیش برینداربوون، بەڵام هیچیان لای ئەوان نەماوە و ئەوانەی برینیان سەختبووە نێردراونەتە سلێمانی.

ڕائید سمكۆ عه‌لی، به‌ڕێوبه‌ری ئاسایشی شاره‌دێی كۆكس یه‌كێك بوو له‌ برینداره‌كان، دوای گه‌یاندنی به ‌نه‌خۆشخانه‌ی فریاكه‌وتنی شار و مانه‌وه‌ی بۆ چه‌ند كاتژمێرێك، به‌هۆی سه‌ختی برینه‌كه‌یه‌وه‌ شه‌هید بوو.

(وێنەی شەهیدانی شەوی ڕابردوو)

س.ح