٣ ڕێکخراو: هێرشەکانی تورکیا ژنان و منداڵان شەهید دەکات

سێ رێكخراوی ئەندام لە یەكێتی لاوانی دیموكراتی جیهانیی، ئیدانەی هێرشەكانی توركیا دەكەن و داوای هەڵوێست لە حکومەت و پەرلەمانەکانی عێراق و هەرێم دەکەن، راشیدەگەیەنن: بۆردوومانەکان ژنان و منداڵان و گەنجان شەهید دەکەن.


لە بەرامبەر هێرشەكانی توركیا بۆ سەر خاكی هەرێمی كوردستان، سێ رێكخراوی ئەندام لە یەكێتی لاوانی دیموكراتی جیهانی لە هەرێم كوردستان و عێراق، ئیدانەی هێرشەكانی توركیا دەكەین.

لە ڕاگەیەندراوەکەدا کە وێنەیەکیان بۆ ڕۆژنیوز ناردووە، داوا لە توركیا دەکەن، کە ڕێز لە یاسا نێودەوڵەتییەكان بگرێت و بە شێوەی ئاشتی دۆسێیەی گەلی كورد چارەسەر بكات لە باكوری كوردستان.

لە ڕاگەیەندراوەکەدا هاتووە: دەوڵەتی توركیا بە شێوەیەكی نابەرپرسانە و بەبێ گوێدان بە یاسا نێودەوڵەتییەكان و ڕێزگرتن لە سەروەری وڵاتان، بەبیانویی هەبوونی پەکەکە هێرش و بۆردوومانەكانی بۆسەر گوند و ناوچەکان بەردەوامە، ئەو هێرشانە دژی پەیماننامەكانی نەتەوە یەگرتووەكان و زیادەڕۆییەكی نەگریسە بۆ سەر خاكی وڵاتمان .

ئەو ڕێکخراوانە تیشکیان خستووەتە سەر ئەنجامی هێرشەکان و ڕایانگەیاندووە:"هێرشەکان بووەتەهۆی شەهیدکردنی منداڵان و ژنان و گەنجان، هەورەها بووەتەهۆی ئاوارەبوونی دەیان خێزانی گوندنشین و زیان گەیاندن بە جوتیاران و خاوەن ئاژەڵەكان، ئێمە هێرشەکان ئیدانە دەکەین و داوا دەکەین، کە عێراق ڕێز لە عێراق و هەرێمی کوردستان بگرێت و کێشەکانی بە گفتوگۆ و ئاشتی چارەسەر بکات.

لە کۆتاییدا داوایان، لە حکومەت و پەرلەمانەکانی عێراق و هەرێم کردووە، کە چیتر بێدەنگ نەبن و هەڵوێستیان هەبێت و دژی داگیرکارییەکان بووەستنەوە.

یەکێتی لاوانی دیموکراتی عێراق

یەکێتی لاوانی کوردستان-عێراق

یەکێتی گشتیی خوێندکاران لە کۆماری عێراق

 

س.ح