پارتی ژیانی ئازادی كوردستان-پژاک ڕایگەیاند، هەرێمەكانی گەریلا بوونەتە ناوەندی سەرەكیی بەرخۆدان و تێكۆشانی گەلی كورد و ئاستی بەرفراوانی شەڕ گەیشتووەتە قۆناغێک، كە چارەنووسی پارتە كوردییەكانی هەر چوار پارچەی کوردستانی بەیەکەوە بەستووەتەوە.
ئەمڕۆ پارتی ژیانی ئازادیی كوردستان پژاک لەهەڵسەنگاندنی ڕەوشی سیاسی هەفتانەی خۆیدا سەبارەت بە بارودۆخی سیاسی لە ڕۆژهەڵاتی ناوەڕاست و كوردستان دەڵێت: ڕۆژهەڵاتی كوردستان و بەشەكانی دیکەی كوردستان کاریگەرییان لەسەر یەک دەبێت، ئێرانیش بەشێکە لە ڕووداوەكانی ڕۆژهەڵاتی ناوەڕاست، ئەم بابەتەش بووەتە هۆی ئەوەی پژاک بە خوێندنەوەی ڕاست لە هەلومەرجە هەنووكەیەكان، ستراتیژی، بەرنامە و تاكتیكی قۆناغەكە بەهۆشیارییەوە دیاری بكات و لەبەر ئەوەش چاوەڕوانی گرتنەبەری ڕێوشوێنی هەنووكەیی خۆیەتی لە داهاتوویەكی نزیكدا.
لە بەشێكی تری هەڵسەنگاندنەكانیدا لەسەر ڕۆژهەڵاتی كوردستان هاتووە: لە ڕۆژهەڵاتی كوردستان، كۆمەڵگە بەهۆی سەركوتكردنەوە جیاواز لە بەشەكانی تری ئێران، لە قۆناغی بەرخۆدانی بەردەوامدایە و تێڕوانینێكی هیوابەخشی بەكرانەوەی زۆرتر، بەرهەڵستی بوونی خۆی هەمیشەیی كردووە، لەبەر ئەوەش لە ڕووی خاوەنداریكردن لە شووناس و هیواكانی دیموكراسیخوازیی، جیاوازی زیاتری لەگەڵ كاركتەرە بەناو ئۆپۆزسیۆنە ئێرانییەكانی تر هەیە، بەڵام بەگشتی لە قەیران و هەڵوەشاندنەوەی ڕژێم بەگشتی، لە چوارچێوەی ئێراندا بەشدارە.
پژاک دەڵێت: بەرنامە هەژموونییەکانی جیهانیش پەیوەستە بە بەرنامەكانی دەوڵەتە داگیركەرەكانی سەر كوردستانەوە، نموونەی هەرە بەرچاویش دۆخی ناتۆ و پەیوەندییەتی لەگەڵ توركیا، ناتۆ هەر خەریكی گەورەكردن و كۆكردنەوەی هێز و دەسەڵاتە لە دژی گەلی كورد، بێگومان دیموكراسی نیوەچڵی ئەوروپا لەگەڵ سیستەمی ئەردۆغانی تورك لەسەر كوردەكان نزیكن لەیەكدییەوە و یەكتر تەواو دەکەن، بەڵام لەهەمانكاتیشدا لەكێبڕكی و ناكۆكی دان.
پارتی ژیانی ئازادی كوردستان لەسەر یەكگرتوویی گەلی كوردیش ئاماژەی بەوەكردووە، لە هەرچوار پارچەی كوردستان، قسەوباس لەسەر “یەكگرتوویی گەلی كورد” و “لەیەكتر دابڕانی بەشەكانی كوردستان لەیەكدی” لەلایەن بەشێك لە ئۆپۆزسیۆن لە ناكۆكی و دژایەتیدایە، دەڵێت: ناسیۆنالیستەكان و بەشێك لە پارتە كلاسیكەكان كە پشتیان بە چەمكی دەوڵەت-نەتەوە بەستووە، لە قوڵایی ئەم ناكۆكی و دژایەتییانەدا جێگایان گرتووە و ئەمانەش خۆی لەخۆیدا گەورەترین زەبر لە پرۆژەی یەكگرتوویی نەتەوەیی دەدات.
لە كۆتاییدا باس لەوەكراوە، کە ئەمڕۆ هەرێمەكانی گەریلا بوونەتە ناوەندی سەرەكیی بەرخۆدان و تێكۆشانی گەلی كورد و لەئێستاشدا بەنرخترین پیرۆزییان دەنووسنەوە، هەروەها هاتووە: ئاستی بەرفراوانی شەڕ گەیشتووەتە قۆناغێك، كە چارەنووسی پارتە كوردییەكانی هەر چوار بەشی بەیەكەوە بەستووەتەوە، چونكە بزووتنەوەیی ئاپۆیی، هەرچواربەشی كوردستانی هاوشێوەی ماڵێكی كوردستانی ڕێكخستووە و هەموو ئۆپۆزسیۆنی كوردیش درک بەو ڕاستییە دەکەن.
س.س
