پەدەکە و یەنەکە لەسەر گۆڕانکاری ئەنجامی هەڵبژاردنەکان لە میدیاکانەوە ڕوبەڕوی یەکتری دەبنەوە و وتەبێژی یەنەکە دەڵێت، ئەنجامەکان سەلماندنی هەوڵی بونی ساختەکاری دەردەخات.
دوای راگەیاندنی ئەنجامی کۆتایی ھەڵبژاردنی ئەنجوومەنی نوێنەرانی عێراق لەلایەن کۆمسیۆنی باڵای سەربەخۆی ھەڵبژاردنەکان، پەدەکە دوو کورسی لە هەولێر و نەینەوا لەدەستدا، لەبەرامبەردا هەردوو کورسیەکە درایە یەنەکە.
مەحمود محەمەد، وتەبێژی پارتی دیموکراتی کوردستان (پەدەکە) ڕایگەیاند: دوو کورسی کە ئیستحقاقی یاسایی دوو کاندیدی پارتیمان بوون لە پارێزگاکانی ھەولێر و نەینەوا بەتاڵان بردراون، بۆیە لەدوای ئەنجامدانی کۆبوونەوەی مەکتەبی سیاسی ھەڵوێستی پارتیمان لەبارەی ئەم کارە ناڕەوایە رادەگەیەنین.
کەمکردنەوەی کورسیەکانی پەدەکە لە ئەنجامی سکاڵای لایەنەکان بوو لەسەر سندوقەکانی دەنگدان و کۆمسیۆن ئاشکرایکرد کە گۆڕانکاری لەو کرسیانەدا بەهۆی دووبارەبونەوەی پەنجە مۆرەکان بووە.
ئەمین بابە شێخ، وتەبێژی یەکێتی نیشتیمانی کوردستان(یەنەکە) لەبەرامبەر قسەکانی وتەبێژەکەی پەدەکەدا ڕایگەیاند: دوو کورسییەکەی پارێزگای نیەنەوا (بازنەی ٢)، و پارێزگای هەولێر (بازنەی ٣) ئیستحقاقی ڕەوای یەکێتیی نیشتیمانی کوردستانن، کە ھەر ئیستحقاقی کوردە لە چوارچێوەی کورسییەکانی کوردە لە ئەنجومەنی نوێنەرانی عیراق.
ئەو وتیشی: گێرانەوەی کورسییەکانی یەکێتی لە چوارچێوەی ھاوپەیمانی کوردستان دوای رەچاوکردنی تانە یاساییەکان و سەلماندنی ھەوڵی ساختەکاری (تزویر) کارێکی باشە و ئێمە پێشوازی لێ دەکەین.
ئەمڕۆ لەگەڵ ئەنجامی کۆتایی هەڵبژاردنی پێشوەختەی ڕۆژی ١٠ی تشرینی یەکەم ئاشکرا بوو کە ئەنجامی پێنج کورسی لە سەرتاسەری عێراقدا گۆڕانکاریان بەسەردا هاتووە کە کورسیەکی بەرەی تورکمانیش لە شاری کەرکوک بە هۆی ساختەکاریەوە لێیان وەرگیرایەوە.
ها-غ
