پەرلەمانتارانی عێراق: نیوەی زیاتری پارەی نەوتی هەرێم بۆ تورکیا و کۆماپانیاکان دەڕوات

پێنجشەممە, 30 أبر 2020 – 15:08  ڕۆژنیوز ـ سلێمانی

سەرکەوت شەمسەدین، ئەندامی لیژنەی دارایی لە ئەنجومەنی نوێنەرانی عێراق- فراکسیۆنی ئایندە و غالب محەمەد ئەندامی ئەنجومەنی نوێنەران- فراکسیۆنی گۆڕان، ئەمڕۆ لە نوسینگەی ئەنجومەنی نوێنەرامی عێراق لە شاری سلێمانی، کۆنگرەیەکی ڕۆژنامەنووسییان بەڕێوەبرد.

لە کۆنگرە ڕۆژنامەنووسییەکەدا غالب محەمەد و سەرکەوت شەمسەدین، ئەوەیان خستەڕوو، کە هەرێمی کوردستان ڕۆژانە ٦٠٠ هەزار بەرمیل نەوت دەفرۆشێت و داهاتی ساڵانەشی هەشت ملیار و ٥٠٠ ملیۆن دۆلارە و لە بڕەش تەنیا سێ ملیار دۆلار بۆ هەرێم دەمێنێتەوە، ئەوانی دیکەی بۆ تورکیا و حەقدەستی کۆمپانیاکانی دیکە دەڕوات، “ئەمەش واتە هەرێمی کوردستان زەرە دەکات لە جیاتی قەزانج، چونکە ئەگەر هەرێمی کوردستان ئەوە ٢٥٠ هەزار بەرمیل نەوتەی ڕۆژانەی بناردایە بۆ بەغدا ئەوا شەش ترلیۆن و نیو دۆلاریان دەست دەکەت”.

غالب محمەد، وتی: حکومەتی هەرێم نەوتی ڕادەستی بەغدا نەکردووە لەبەر ئەوەی نەوتەکەی مووڵکی خۆی نییە،  بەڵکو موڵکی ژمارەیەکی کەسی حزبی ومافیا و بنەماڵەکانە، هەر ئەمانەش وایان کردووە کە نەوت ڕادەستی عێراق نەکرێت و زەرەر بە کورد بگەیەندرێت.

ئەو دوو پەرلەمانتارە لەگەڵ چەند پەرلەمانتارێکی دیکەی کورد لە بەغدا، چەند چارەسەرییەکی کاتی و درێژخایەنیان ئامادەکردووە، کە چارەسەرە کاتییەکان بۆ دۆخی ئێستا هەرێمی کوردستان وەهایە:

-هەموو پەرلەمانتارانی کورد لە ئەنجومەنی نوێنەرانی عێراق یەک دەنگبن و دەنگ نەدەن بە کابینەکەی مستەفا کازمی تا ئەو کاتەی بەڵێنی ناردنی مووچەی فەرمانبەرانی ڕاستەقینەی هەرێمی کوردستان نەدات.

-هەموو پەرلەمانتارە کوردەکان لە بەغدا ڕازی نەبن بەوە کە چیتر حکومەتی هەرێمی کوردستان و حکومەتی عێراقیش  مووچەی فەرمانبەرانی هەرێمی کوردستان ببڕن، چونکە هاوڵاتی پەیوەدنی نییە بەوەی کە چی ڕوودەدات لە نێوان بەغدا و هەولێر وکێشەکانیان.

-دەبێت ئەم دەرفەتە بقۆزینەوە بەوەی کە کازمی بڕیاربدات کە مووچەی فەرمانبەرانی ڕاستەقینەی هەرێم بنێرێت و هاوتەریب بەوە دەبێت کازمی ڕێگای تەواو بگرێتەبەر بۆ ڕێگرتن لە تاڵانکردنی نەوتی هەرێمی کوردستان، هەروەها هەناردەکردنی نەوتی هەریمی کوردستان لەڕێگای کۆمپانیان سۆمۆوە.

چارەسەرە درێژخایەنەکان:

-ناچارکردنی حکومەتی هەرێمی کوردستان بە پێدانی سەرجەم داتا و زانیاری سەربارەت بە فەرمانبەرانی هەرێمی کوردستان، بۆ ئەوەی حکومەتی عێراقی مووچەی فەرمانبەرانی ڕاستەقینە بدات.

-بڕیاردان بۆ تۆمارکردنی سکاڵای لەسەر هەردوو حکومەتی عێراقی و هەرێمی کوردستان بەهۆی ئەو پشێلکاریە دەستوور و یاساییانەوە کە ئەنجامیان داوە.

-کار بکەین لەسەر ئەوەی پڕۆژە یاسایەک لە ئەنجومەنی نوێنەرانی عێراقدا تێپەرێندرێت، بۆ سزادان و خستنە لیستی ڕەشی ئەو کەسایەتی و بانکانەی هەرێمی کوردستان کە مامەڵە بە فرۆشتن و هەناردەکردنی نەوتی هەرێمی کوردستانەوە دەکەن بەبێ پرسی عێراق و کۆمپانیای سۆمۆ.

س.ح