چوؤرشەممە, 11 أبر 2018 – 10:31
ڕۆژنیوز- بڕیار محەمەد
ژمارەیەک لە پەر لەمانتارانی هەرێم بەستنی کۆنگرەی نەتەوەیی بە گرنگ دەزانن، هۆکاری گرنگییەکەشی بۆ ئەوە دەگێڕنەوە کە ئێستاکە پلانێکی نێودەوڵەتی دژی کورد هەیە لە هەرچوار پارچەی کوردستاندا.
دوو پەرلەمانتاری فراکسیۆنەکانی یەکێتی و شیوعی، لە پەرلەمانی هەرێمی کوردستان، باس لە ڕۆڵ و بایەخی کۆنگرەی نەتەوەیی دەکەن و بە گرنگی هەڵدەسەنگێنن و دەشڵێن، لەم كات و ساتەدا، کۆنگرەی نەتەوەیی ڕۆلێكی باشی هەیە، چونكە ئێستا پلانێكی نێودەوڵەتی لە دژی گەلی كورد لە ڕۆژئاوا و باكور باشوری كوردستان هەیە.
خەلەف ئەحمەد، ئەندامی پەرلەمانی كوردستان لە فراكسیۆنی یەكێتی ڕای وایە کە یەكڕیزیی و یەكهەلوێستیی لەم دۆخەی ئێستادا بۆ گەلی كورد لە هەرچوار پارچەی كوردستان زۆر گرنگە، چونكە پلانی مەترسیدار لە دژی كورد لەئارادایە، بۆیە پێویستە كەنەكە لەم دۆخەدا كۆنگرەی نەتەوەیی كورد ببەستێت و هەوڵەكانیشی بخاتەگەڕ بۆ كۆكردنەوەی هەموو هێز و لایەنەكان لە هەموو پارچەكانی كوردستان تا لە بەرامبەر پلان و هێرشەكانی دوژمانی كورد یەكدەنگ و یەكهەڵوێست بین .
عەبدلرەحمان فارس، سەرۆكی لیستی ئازادیش لە پەرلەمانی هەرێمی كوردستان ڕای وایە کە بەستنی كۆنگرەی نەتەوەیی كورد، ئەمڕۆ لە هەمووكاتێك پێویستترە، چونكە ڕۆژانە لەلایەن دوژمنانی كورد هەوڵی بچوكکردنەوەی پێگە و قەبارەی گەلی كورد دەدرێت، هێرشەكانی سەرعەفرین و كەركوك و خورماتوو و مەترسییەكانی سەر قەندیلیش هەموویان بەشێكن لەو پلانەی كە لە لایەن دوژمنانی گەلی كورد داڕێژراوە.
عەبدولڕەحمان وتیشی: بەداخەوە لەهەمبەر ئەو پرسە گرنگانەشدا پەرلەمانی كوردستان و حكومەتی هەرێمی كوردستان بێدەنگن، لە كاتێكدا پەرلەمانی كوردستان چەندین ساڵە داوای دەركردنی هێزە داگیركەرەكان دەكات لەسەر خاكی هەرێمی كوردستان، بەڵام حكومەت هەتا ئێستا لێی بێدەنگە .
د.خ
