سێشەممە, 27 مار 2018 – 13:49
ڕۆژنیوز – سلێمانی
پەرلەماتارێكی پارتی ڕایدەگەیەنێت، كە ئەقڵیەتی داگیركاریی تورك بێشەرمانە هێرش دەكاتە سەر كورد و دونیاش لێی بێدەنگە، دەشڵێت: تەنها ڕێگە بۆ ڕووبەڕووبوونەوەی داگیركەران یەكگرتنی كورد و یەكخشتنی نێوماڵی كوردە.
دەوڵەتی توركیا ماوەیەكە هەڕەشەی هێرشكردن دەكات بۆ شارۆچكەی شەنگال و لە هەوڵەكانی داگیركاریەكانی لە ڕۆژئاوای كوردستان بەردەوامە، ماوەی چەند ڕۆژێكیشە لەڕێگەی فڕۆكەوە دەڤەری برادۆست و بناری قەندیل بۆردوومان دەكات.
لەبارەی هەوڵەكانی داگیركاریی دەوڵەتی توركەوە، عەلی هالۆ، پەرلەمانتاری پەرلەمانی هەرێمی كوردستان لە فراكسیۆنی پارتی، بە ڕۆژنیوزی وت:”زۆر بەداخەوە لەناوخۆی كوردستاندا یەكگرتوویی نییە، داگیركەرانی كوردستانیش هەبوونی كورد و كیانی كورد بە مەترسی دەزانن بۆسەر ئاسایشی نەتەوەیی خۆیان، لێدان و نەمانی كوردیش بەسەركەوتن دەزانن”.
وتیشی:”ئەم پیلانە پیلانێكی زۆر مەترسیداری توركیا و داگیركەرانی دیكەی كوردستانە، كە ئێران و عێراق و سوریا-یە، بەهاوكاری وڵاتانی دیكە بەڕێوە دەچێت، لەو پیلانەدا هێرشێكی فراوان دەكەنە سەر كوردستان، لە باكوری كوردستان هێرشیان كردە سەر شارەكانی ئامەد و گەڤەر و چەندین شاری دیکە و وێرانیان كرد، دواتر هێرشیان كردە سەر كانتۆنی عەفرین، هەتاوەكو ئێستا گولەیەك لە عەفرینەوە ئاڕاستەی توركیا نەكراوە، عەفرین قەڵای ئاشتی بوو لە ناوچەكە، بەڵام عەقڵیەتی داگیركاری تورك بێشەرمانە هێرش دەكاتە سەر كورد، كۆمەڵگای نێودەوڵەتیش بێدەنگە”.
ئەو پەرلەمانتارەی پارتی دیموكراتی كوردستان- عێراق، پێی وابوو كە دەبێت ئێمەی كورد نێوماڵی خۆمان یەك بخەینەوە، لەسەر پرسە نەتەوەیی و نیشتیمانییەكان یەكبگرین، دەشڵێت: ئەمە تەنها فاكتەرە بۆ ئەوەی لە پیلان و هێرش و پەلاماری دوژمنان پارێزراوبین.
س.ح
