پەرلەمانتارێك داوا دەكات پارەی خوێندنی پاراڵێڵ نەمێنێت

ئەندامێكی پەرلەمانی كوردستان داوا دەكات ئەو خوێندكارانەی زانكۆ و پەیمانگاكان بەپارە دەخوێنن بەپێی سیستەمی پاراڵێڵ، لەمەودوا پارەیان لێ‌ نەسەنرێت.


مەم بورهان قانع ئەندامی پەرلەمانی كوردستان لە فراكسیۆنی نەوەی نوێ لە ڕاگەیەنراوێكدا كە وێنەیەكی بۆ ڕۆژنیوز نێردراوە ڕایگەیاند:" بەهۆی قەیرانە دروستكراوەكەی چەند ساڵی ڕابردووی هەرێمی كوردستانەوە، یەكێك لەو بابەتانەی لەڕێی وەزارەتی خوێندنی باڵای حكومەتی هەرێمی كوردستانەوە، دەرگای بەڕوودا كرایەوە، كردنەوەی سیستمی خوێندنی پاراڵێڵ بوو بۆ خوێندنی بەشێكی خوێندكاران بە پارە، لە نێوەندەكانی خوێندنی زانكۆ و پەیمانگە حكومییەكانی هەرێمی كوردستان دا، كە بەمەیش داهاتی ساڵانەی خوێندن لە زانكۆ و پەیمانگەكانی سەرتاسەری هەرێمی كوردستان دا، زیاتر لە ملیارێك دیناری تێپەڕاند (هەرچەندە داتایەكی ورد لەبەردەستدا نییە).

لە درێژەی ڕاگەیەندراوەكەدا ئەو پەرلەمانتارە ڕایگەیاندووە: دوای تێپەڕاندنی قەیرانی دارایی هەرێم، پێویستە ئەم بارگرانییە حكومییە لەسەر ئەو خوێندكارانە لاببرێت؛ كە بە پارە لە پەیمانگە و زانكۆ حكومییەكان دا دەخوێنن و  لە ئێستادا حكومەت هیچ پێویستییەكی بەو داهاتە نییە، یان لانیكەم بەڕێژەی 50% كەمبكرێتەوە، هەروەك چۆن پێویستە پارەی خوێندن لە زانكۆ ئەهلییەكانی كوردستانیشدا، بە سیستمێك ڕێكبخرێت، كە حكومەت جورئەتی ئەوە بكات؛ پەیمانگە و زانكۆ ئەهلییەكان ناچار بكات بەڕێژەیەكی زۆر، كرێی خوێندن كەمبكەنەوە.

د.ح