پەرلەمانتارێك هۆكاری لانەبردنی گەمارۆی سەر كامپی مەخمور ئاشكرا دەكات

 ئەندامێكی پەرلەمانی هەرێمی کوردستان، هۆكاری لانەبردنی گەمارۆی سەر كامپی مەخمور ئاشکرادەکات و ڕایدەگەیەنێت پرسی گەمارۆی سەركامپی مەخمور پەیوەستە بە دەستوەردانەکانی دەرەوە بەتایبەتی توركیا، دەشڵێت: تائێستا هیچ ڕێكارێكی گرنگی پەیوەست بەو پرسە نەگیراوەتەبەر.


لەدوای ڕووداوی تەقەكردنەکەی ڕێستۆرانتی هۆقەباز و كوژرانی بەرپرسێكی میت، لەوكاتەوە کە دەکاتە ١٢١ ڕۆژ كامپی پەنابەرانی مەخمور لە لایەن بەرپرسانی هەولێرەوە گەمارۆیەكی توندی خراوەتە سەر و تائێستاش بەردەوامە.

شیرین ئەمین، ئەندامی فراكسیۆنی گۆران، لەپەرلەمانی هەرێمی كوردستان، لەبارەی گەمارۆی سەر كامپی  مەخمور بە ڕۆژنیوزی ڕاگەیاند: وەك پەرلەمانتار و ئەركی خۆم كە هەستمانكرد و بیستمان گەمارۆ لەسەر كامپی مەخمور هەیە بەتایبەتی لە دوای ئەوەی لە ١٧-٧-٢٠١٩ كە جێگری كونسوڵی توركیا لە هەولێر كوژراو ئەو كامپە گەمارۆدرا كە سەدان كرێكار، ژن، منداڵ، نەخۆش و خەڵكی پەككەوتەی لێیە، بەڵام ڕێگایان پێنادرێ بێنە ناو هەولێردەستمان بە بەدواداچوون کرد.

وتیشی: لە بەدواداچوونەكانمان راپۆرتێكی ووردمان لەوبارەیەوە ئامادەكرد و ئاراستەی لیژنەی ناوچەكانی دەرەوەی هەرێممان لە پەرلەمانی كوردستان  كرد، هەروەها بەپێی ماددەی ٥٨ی پەیڕەوی ناوخۆش كە ڕێگە بە پەرلەمانتار دراوە لەهەر بابەتێك پرسیار ئاراستەی لایەنە پەیوەندیدار بكات، بۆیە منیش پرسیارێكم لە بارەی گەمارۆکەوە ئاراستەی لایەنی پەیوەندیدار كردووە، بەڵام تا ئێستا وەڵامەكەی نەهاتووەتەوە.

لەبارەی هۆكاری سەرەكی لانەبردنی گەمارۆی سەركامپەكەش ئەو پەرلەمانتارە ڕایگەیاند "ئەو پرسە پەیوەستە بە دەستوەردانی دەرەوە بەتایبەتی توركیا كە كاریگەرییان بەسەر هەژموونی كوردستانەوە هەیە."

شیرین ئەمین  باسی لەوەشكرد: ڕێگای دیكەش هەیە بۆ لابردنی گەمارۆی سەر كامپەكە ئەوەش پەیوەستە بە خەڵكی كوردستان و ڕێكخراوە مەدەنییەكان و پەرلەمانی كوردستان، كە دەبوایە بێتە دەنگ، لە کاتێکدا ئەنجوومەنی كامپی مەخمور خۆیان بە نووسراوی فەرمی داوایان كردووە هەڵوێستێك هەبێ بەڵام تائێستا هیچ ڕێكارێكی گرنگی پەیوەست بەو پرسە نەگیراوەتەبەر.

ک.س