پێنجشەممە, 5 يول 2018 – 15:56 ڕۆژنیوز – شۆڕش بەنەک
٣٠ی ئیلول هەڵبژاردنی پەرلەمانی هەرێمی کوردستان بەڕێوەدەچێت، لەبارەی ئەو هەڵبژاردنەوە و هەروەها پرسی پۆستی سەرۆکایەتیی هەرێم تەلار لەتیف، پەرلەمانتاری یەکێتی لە پەرلەمانی هەریمی کوردستان بۆ ڕۆژنیوز دووا.
تەلار لەتیف، وتی: ماوەی سەرۆکایەتیی هەرێم و درێژکردنەوەی بەسەرچووە، بۆیە هەڵبژاردنی پەرلەمان و سەرۆکایەتیی هەرێم دەبێت پێکەوە ئەنجام بدرێن، ئەگەر ئەو دوو هەڵبژاردنە پێکەوە ئەنجام نەدرێن، پەرلەمان ناتوانێت هیچ یاسایەک پەسندبکات، بۆ ئەوەشە کە ئەو بڕیارەی سەرۆکی حکومەتی هەرێمی کوردستان بۆ ئەنجامدانی هەڵبژاردن دەریکردووە یاسایی نییە، نابێت بەهۆی بەرژەوەندییە حزبییەکانەوە بەرژەوەندییە یاساییەکان پێشێلبکرێن.
تەلار لەتیف، ئاماژەی بەوەشکرد، کە پرۆژەی دابەشکردنی دەسەڵاتی سەرۆکایەتی هەرێم و درێژکردنەوەی دەسەڵاتەکەی و هەروەها نووسینی دەستوور لەلایەن پارتییەوە هاتووە بۆ پەرلەمان، ئەوەش مەترسیدارە و لەبەرامبەریدا دەبێت ڕێککەوتنی حزبیی پێک بێت.
ئەو پەرلەمانتارەی یەکێتی لەبارەی دامەزراندنی ئەنجومەنێک لەجیاتی سەرۆکایەتی هەرێم وتی: تا ئێستا پرۆژەیەکی وەها نەهاتووەتە پەرلەمان، بۆ پرۆژەی لەو جۆرە دەبێت ڕێککەوتنی حزبی پێکبێت، چونکە ناکرێت بۆ بەرژەوەندیی کەس یان حزبێک، قانون و بەژەوەندیی گشتی ببێتە قوربانی.
ش.ف
