پەرلەمانى هەرێمى کوردستان بۆ دەنگدان لەسەر پڕۆژە یاساکانى كۆمپانیا ئەمنییە تایبەتەكان لە هەرێم، سەرپەرشتیكردنی پڕِۆژەكانی كشتوكاڵ و خستەڕووى ڕاپۆرتى هەردوو لیژنەی ناوخۆ و ئاسایش و ئەنجوومەنه خۆجێیەكان و لیژنەی پەروەردە و خوێندنی باڵا سەبارەت بە خۆپیشاندانی خوێندكاران، لە کۆبونەوەدایە.
لە ئێستادا پەرلەمانى هەرێمى کوردستان لەبارەى چەند پرسێکەوە لە کۆبونەوەدایە و سەرەتاى کۆبونەوەکەش بە نیشاندانى وێنەى ئەو هەشت شەهیدە دەستپێکرد، کە لە چەند ڕۆژى ڕابردوودا بە دەستى چەتەکانى داعش لە سنورى گەرمیان شەهیدکران.
بە پێى کارنامەى دانیشتنەکە لە کۆبونەوەکەدا دەنگ دەدرێت لەسەر پڕۆژە یاسای كۆمپانیا ئەمنییە تایبەتەكان لە هەرێمی كوردستان-عێراق، به‌پێی حوكمی مادده‌كانی (٩٠- ٩١- ٩٣- ٩٦- ٩٧) له په‌یڕه‌وی ناوخۆی په‌رله‌مانی هەرێمى كوردستان.
یەکێکى دیکە لە تەوەرەکانى کۆبونەوەکە تایبەتە بە خستنەڕووی بەدواداچوونی هەردوو لیژنەی ناوخۆ و ئاسایش و ئەنجوومەنه خۆجێیەكان و لیژنەی پەروەردە و خوێندنی باڵا و توێژینەوەی زانستی، سەبارەت بە خۆپیشاندانی خوێندكاران.
بەپێى کارنامەى دانیشتنەکە لە کۆبونەوەکەدا خوێندنه‌وه‌ی دووه‌م بۆ پڕِۆژە یاسای سەرپەرشتیكردنی پڕِۆژەكانی كشتوكاڵی لە هەرێمی كوردستان، به‌پێی حوكمی -مادده‌كانی (٨٧- ٨٨، ٨٩) له په‌یڕه‌وی ناوخۆ دەکرێت.
هەروەها، لە نوسراوێکدا لە رۆژى ٢٩ ى مانگى ڕابردوو ٢٠ ئەندامى پەرلەمانى هەرێمى کوردستان داوای ئەنجامدانى دانیشتى پەرلەمانیان کرد بە بەشدارى هەریەکە لە قوباد تاڵەبانی و رێبەر ئەحمەد، کە تێیدا داوای روونکردنەوەیان لێ بکرێت لەبارەی ئەو توندوتیژیانەی لە خۆپیشاندانەکانى دوو هەفتە پێش ئێستادا بەرامبەر بە خوێندکارانى زانکۆ و پەیمانگاکان بەکارھێنرا.
جێگەى ئاماژەیە، دوو هەفتە پێش ئێستا خوێندکارانى زانکۆ و پەیمانگاکانى بەشێکى زۆر لە ناوچەکانى هەرێمى کوردستان خۆپیشاندانیان ئەنجامدا و تێیدا داوایانکرد، کە حکومەت مانگانە بڕیک پارەیان وەک دەرماڵە بۆ خەرج بکات، بەڵام لە هەندێ ناوچە توندوتیژى بەرامبەر خۆپیشاندەران بەکارهات و هێزێکى زۆرى ئەمنیش هێنرایە ناو شار و شارۆچکەکان، کە تائێستاش لەو شوێنانە جێگیرکراون و دەسەڵاتدرانیش بە مەبەستى ڕێگرى لە درێژەدان بە خۆپیشاندانەکان بڕیاریاندا بۆ ماوەى چەند ڕۆژێک دەرگاى زانکۆ و پەیمانگاکان دابخەن.
ئ.م
